Aqtóbede 24 kompanııany jabý týraly másele qaraldy
AQTÓBE. QazAqparat - Aqtóbede jer qoınaýyn paıdalanýshy kompanııalar kelisimshart talaptaryn oryndamaǵany úshin jabylyp jatyr. Oblys ákimdiginde 24 kompanııany jabý týraly másele qaraldy, dep habarlaıdy QazAqparat tilshisi.
Aqtóbede ken ıgerip, jer qoınaýyn paıdalanyp otyrǵan kompanııalarǵa birneshe mindetteme júktelgen. Olar únemi ınvestıtsııa salýǵa, qarjylyq jaǵdaıyn kúsheıtýge, bıznestiń áleýmettik jaýapkershiligi aıasynda qurylys jumystaryn júrgizýge mindetti. Biraq keıbir kompanııalar óz mindetine alǵan jumysty oryndaýǵa qulyqsyz.
«Oblys aýmaǵynda 49 jer qoınaýyn paıdalanýshy kompanııa jumys isteıdi. Kásiporyndardyń qarjy, áleýmettik jáne ınvestıtsııalyq mindettemelerine oraı 70 kelisishart jasaldy. Ókinishke qaraı, barlyǵy birdeı kelisimsharttyń talaptaryn oryndap otyrǵan joq»,- dedi Berdibek Saparbaev.
Aqtóbedegi jer qoınaýyn paıdalanýshylar qarjy mindettemelerin 51%, al kómirsýtek shıkizatyn óndiretin kompanııalar 85% oryndaǵan. Indýstrııalyq-ınnovatsııalyq damý basqarmasy basshysynyń orynbasary Darhan Ermaǵanbetovtyń habarlaýynsha, áleýmettik mindettemelerdi oryndaý men ınvestıtsııa salý tym baıaý. Jıyn kezinde Berdibek Saparbaev oblys ákimdigi Energetıka mınıstrligi men Investıtsııalar jáne damý mınıstrliginiń qoldaýymen mindetterin oryndamaǵan kompanııalarmen aradaǵy kelisimshartty buzý jumysyn jalǵastyratynyn aıtty. Bıyl 4 kompanııamen aradaǵy 5 kelisimsharttyń kúshi joıyldy. Al ótken jyly 8 kelisimshart toqtatyldy. Áli 24 kompanııanyń máselesi qaralyp jatyr. Sonyń ishinde «Aqtóbetermokoks» JShS-men kelisimshartty buzý jóninde Energetıka mınıstrligine hat jiberilgen. Investıtsııa jáne damý mınıstrligine «Temir servıs» JShS jáne «Batys Kalıı» JShS-ne qatysty sharalar qoldaný týraly ótinish berildi.
Aqtóbe oblysy ákimi baspasóz qyzmetiniń habarlaýynsha, jıynda jergilikti mamandardy oqytý men qaıta daıarlaý máselesi jeke qaraldy. Zańǵy sáıkes kásiporyndar jergilikti mamandardy daıyndaý jáne qaıta daıyndaýdy qarjylandyrýǵa mindetti. Sonymen qatar, kompanııalar bilim berý uıymdarynyń negizgi materıaldyq-tehnıkalyq bazasyn jaqsartýǵa úles qosýy tıis.
Óńir basshysy B.Saparbaev jer qoınaýyn paıdalanýshy kásiporyn basshylaryn kolledj sheberhanalary men zerthanalaryn naqty óndiriske saı zamanaýı jabdyqtarmen qamtamasyz etýge shaqyrdy. «Jer qoınaýyn paıdalanýshylarǵa qoıylatyn basty talap - kelisimshart mindettemelerin saqtaý. Biz muny qatań baqylaýda ustaımyz. Sizderge júkteletin taǵy bir mindet - óndiristik kórsetkishterge, sonyń ishinde, kómirsýtegi shıkizatyn óndirýge baılanysty bekitilgen jospardy oryndaý, - dedi B.Saparbaev.
