Aqtóbede 23 shaqyrymdyq jol jóndeý jumysy bes jylǵa sozylyp ketti
AQTÓBE. KAZINFORM — Qutıkól-Jarma-Quıylys-Jaısańbaı baǵytyndaǵy aýdandyq mańyzy bar 23 shaqyrymdyq jol jóndeý jumysy 2021 jyly bastaldy. Alaıda áli kúnge deıin qoldanysqa berilmedi.
Yrǵyz aýdany Qutıkól aýylynyń turǵyndary jınalyp, másele kóterdi. Olar aýdan ortalyǵy men aýyl arasyn jalǵaıtyn jol jóndeý jumysynyń uzaqqa sozylǵanyna narazy.
— Yrǵyz-Qutıkól baǵytyndaǵy 23 shaqyrymdyq joldyń qurylysy 2021 jyldan beri aıaqtalmaı keledi. 2025 jyly jol qurylysyna bólinetin qarjy qaıta qaralyp, bólindi. Merdiger kompanııa anyqtalyp, jumystyń jartysyna jýyǵy oryndaldy. Bıyl jol qurylysy tolyq aıaqtalýy tıis bolǵanymen búginge deıin jalǵasqan joq. Merdiger kompanııa ókilderiniń aıtýynsha, tapsyrys berýshi Yrǵyz aýdany ákimdigi qajetti qarjyny aýdarmaǵan. Al aýdan ákimdigi aýdaratyn qarjy joq ekenin aıtty, — dedi turǵyndar. Olar jol aýdan ortalyǵymen aradaǵy baılanys, medıtsınalyq kómek, bilim alýǵa múmkindik beretin baǵyt dep sanaıdy. Ári tek Qutıkól emes, odan ári Jarma, Quıylys, Jaısańbaıǵa baǵyt alǵan turǵyndar da qoldanatynyn aıtty.
Aýdandyq mańyzy bar jolǵa qarjy oblystyq bıýdjetten bólindi. Aqtóbe oblystyq jolaýshylar kóligi jáne avtomobıl joldary basqarmasynyń habarlaýynsha, joba 2021 jyly maquldandy. 2022 jyly joldy ortasha jóndeýge 267 mln teńge bólindi. Merdiger mekeme — «Abaı-B» JShS. Alaıda kompanııa kelisimshart mindettemelerin oryndamaı, qarjy sot arqyly keri qaıtaryldy. 2023 jyly jol jóndeý jumysy ýaqytsha toqtap turdy. Al 2024 jyly jobaǵa túzetý engizilip, sol jyly eki ýchaskege 900 mln teńgege jýyq qarjy qarastyryldy. 2025 jyly bólingen qarjy tolyq ıgerildi. Bıyl atqarylǵan jumystyń aktisin qabyldap, 100 mln teńgege aýdarylady.
— 0–15 jáne 15–23 shaqyrym aralyǵyndaǵy jol ýchaskelerinde jóndeý jumystary kezeń-kezeńimen júrgizilip jatyr. 2025 jyly jol negizin daıyndaý jáne tegisteý jumystary oryndalyp, qajetti qurylys materıaldary daıyndaldy. Bıyl jol jıekterin retke keltirý jáne asfaltbeton jabynyn tóseý jumystaryn aıaqtaý josparlandy. Jumysty jalǵastyrý maqsatynda merdiger uıym «Túlkibas joldary» JShS-men qosymsha shart jasaldy. Qarjy tolyq kólemde qarastyrylǵan jáne jumystyń oryndalýy men rastalýyna qaraı aýdarylady. Qazirgi ýaqytta qajetti qurylys materıaldary tolyq kólemde daıyndalyp, Áıteke bı aýdanynyń Qarabutaq aýylyndaǵy asfalt zaýytynda jınaqtalǵan. Atalǵan jol ýchaskelerindegi jóndeý jumystaryn jyl sońyna deıin aıaqtaý josparlanyp otyr, — dep habarlady Aqtóbe oblysy ákiminiń baspasóz qyzmeti.
Eske salsaq, Aqtóbe qalasynda bir jarym shaqyrymdyq jol qurylysy eki jylǵa sozylyp, turǵyndar shaǵym túsirdi.
