Aqtóbede 21 mekteptiń qazandyǵy ǵımarat ishinde ornalasqan
AQTÓBE. KAZINFORM – Aqtóbe oblysynda qazandyǵy ǵımarat ishinde ornalasqan, mektepke japsarlas salynǵan 21 bilim berý mekemesi bar. Órt qaýipsizdigi úshin jylytý qazandyǵyn qaıta salý usynyldy.
Aqtóbe oblystyq Bilim basqarmasy Kazinform tilshisine qaı aýdanda qaı mekteptiń qazandyǵy ǵımarat ishinde ornalasqanyn tizbektep berdi. Qazir barlyǵy 21 mektep máselesi ózekti. Olar: Alǵa aýdanyndaǵy Amangeldi jáne Taldysaı negizgi mektepteri, Áıteke bı aýdany Aqtasty orta mektebi, Qarǵaly aýdany Velıhovka bastaýysh mektebi, Qobda aýdanynda Qósótkel jáne Qobylandy negizgi mektepteri, Mártók aýdanynda Baıtorasaı negizgi mektebi, Dmıtrıevka orta mektebi, Muǵaljarda Aqsý, Sabyndykól negizgi mektepteri jáne №59 bastaýysh mektebi, Oıyl aýdanyndaǵy Qarasý, Terikti negizgi mektepteri men Ekpetal mektep-balabaqshasy, Qubasaı, Qurman bastaýysh mektepteri, Shalqar aýdanynda Shoqysý negizgi mektebi men №№ 33, 36, 44, 60 bastaýysh mektepteri.
«21 mekteptiń altaýy elektr qazandyǵymen jylytylady. Olar Alǵa, Mártók, Oıyl, Shalqar aýdandarynda ornalasqan. Qalǵan 15 mekteptiń máselesin sheshý joly qarastyrylady. Qazir Alǵa aýdany Taldysaı negizgi mektebine jobalyq-smetalyq qujat daıyndalyp jatyr. Al Oıyl aýdany Ekpetal negizgi mektebi men Muǵaljar aýdany №59 bastaýysh mektebine jańa orynnan qurylys montaj jumystary júrgizilýde. Al Áıteke bı aýdanyndaǵy Aqtasty orta mektebi men Qobda aýdanyndaǵy Qobylandy negizgi mektebinde qazandyq salynady. Qobda aýdanyndaǵy Qosótkel negizgi mektebiniń qazandyǵyna qarjy qarastyrylǵanymen, qurylys-montaj jumysy bastalmady. Muǵaljar aýdanyndaǵy Aqsý negizgi mektebi men Oıyldaǵy Terekti negizi mektebi 2025 jyly jańarady. ıAǵnı, jańa bilim ordasynyń qurylysy josparlanǵan. Qalǵan 7 bastaýysh mekteptiń máselesi 2028 jylǵa deıin sheshiledi. Olarda bala sany az. Keıbirinde 5, keıbirinde 25 oqýshy ǵana bar», - dep habarlady Aqtóbe oblystyq Bilim basqarmasy.
Aıta keteıik, Aqtóbe oblysy ákimdiginde ótken jıynda áleýmettik nysandardaǵy gaz qazandyqtaryn ǵımarattyń syrtyna aýystyrý jaıy aıtyldy. Oblys ákimi Ashat Shaharov qazandyqtardy buzyp, bólek salýdy tapsyrdy.
Buǵan deıin jazǵanymyzdaı, Aqtóbe oblysy Muǵaljar aýdany Juryn men Qarakól aýyldarynyń arasyndaǵy jol qurylysy bıyl tolyq aıaqtalýy tıis. Muǵaljar aýdandyq TÚKSh, jolaýshylar kóligi jáne avtomobıl joldary bólimi merdigerdi sotqa bergenimen, jeńilip qaldy.
