Aqtóbede 200-ge jýyq adam ulttyq kıimmen kóshede júrip ótti
AQTÓBE. KAZINFORM – Ulttyq kıim kúni Aqtóbede 200-ge jýyq adam ulttyq kıim kıip, Abaı dańǵylymen júrip ótti.
Aqtóbe oblysynda Ulttyq kıim kúni memlekettik jáne bıýdjettik sala mekemelerimen qatar kásipkerlik salasynda da ulttyq kıimge basymdyq berildi.
Qazirgi kezde oqýshylardyń bári sabaqqa oıý-órnegi bar kıim kıip júr.
Búgin 200-ge jýyq aqtóbelik ulttyq kıimdi nasıhattaý maqsatynda Abaı dańǵylymen júrip ótti.
Onda bas kıim jáne onyń túrleri, jasy men jynysyna qaraı erekshelenetin kıimderdiń mán-maǵynasy atalyp, túsindirildi.
— Ulttyq kıim kúni Aqtóbe qalasynyń 155 jyldyǵyn da atap óttik. Osy kúni qazaqtyń 155 ulttyq kıimin nasıhattaý úshin «Ult kelbeti» atty marafon uıymdastyrdyq. Abaı dańǵylymen júrip ótkende kıim túrleri men sıpattamasy tanystyrylyp, kontsert te ótti. Marafonǵa túrli mádenıet oshaqtaryndaǵy 100 qyzmetker men oqý oryndaryndaǵy 100-ge jýyq stýdent keldi, — dedi Aqtóbe qalalyq mádenıet jáne tilderdi damytý bóliminiń basshysy Gúljaına Beısenǵalıeva.
Qalanyń ortalyǵyna jınalǵan top án salyp, aq kımeshek kıgen ájeler men aqsaqaldar bata berdi.
— Naýryz — qazaqtyń jańa jyly. Kishkentaı kezimizde 14-naýryzda úı aralap kórisip júretin edik. Sol kezde úlkender tátti berip, qýanyp qalatynbyz. Qazir dástúr qaıta jańǵyryp jatyr. Ózimiz ulttyq kıimdi naýryz aıynyń basynan bastap kıip júrmiz. Ózimniń tórt balam bar. Bári de ulttyq kıim kıip júr. Olar da endi túsinip, qabyldap jatyr. Bolashaqta jalǵastyrady dep oılaımyz, — deıdi «Geolog» mádenıet úıiniń sýretshisi Nurlan Moldaǵalıev.
