Aqtóbede 200-den astam memlekettik qyzmetshiniń orny bos tur
Ádep jónindegi keńes pen ýákilderdiń atqaratyn róli orasan zor. Olardyń jumysy memlekettik qyzmetshilerdiń quqyqtary men múddelerin qorǵaý baǵyttalǵan. Memlekettik qyzmet isteri agenttiginiń oblystyq departament basshysy Ádilbek Muqashevtiń aıtýynsha, aldyn alý sharalary memlekettik qyzmetshiler tártibin jaqsatýǵa yqpal etti.
«Jergilikti atqarýshy jáne ortalyq memlekettik organdardyń aýmaqtyq bólimsheleri atqarǵan jumysy nátıjesinde ádep normalaryn buzý 2018 jylmen salystyrǵanda 28 paıyzǵa, memlekettik qyzmetke kir keltiretin teris qylyqtardyń sany 35% azaıǵan. Atalǵan ózgerister qoǵamnyń belsendi azamattyq ustanymyna da baılanysty. Sonymen birge, buqaralyq aqparat quraldary da mańyzdy ról atqarady», - dedi Á. Muqashev.
Ótken jyly Ádep jónindegi keńeste memlekettik qyzmetshilerge qatysty 26 tártiptik is qaralyp, 21 memlekettik qyzmetshi tártiptik jaýapkershilikke tartyldy.
«Shalǵaı aýyldarda kadr tapshylyǵy bar. Oblysta 272 memlekettik qyzmetshiniń orny bos. Degenmen kadrlardyń memlekettik qyzmetten ketýi tómendegen. Genderlik saıasat saqtalýda. Memlekettik qyzmetshiler arasyndaǵy áıelderdiń úlesi 58,1% quraıdy. Memlekettik qyzmetshilerdiń ortasha jasy - 39,3 jas. Ortasha memlekettik qyzmet ótili – 10,7 jyl. Atqaratyn laýazymdaǵy ortasha eńbek ótili 4 jyldy quraıdy. Jyl saıyn bilim sapasy jaqsarýda. Oblystaǵy memlekettik qyzmetshilerdiń 89,5% - joǵary bilimdi, 16% nemese 685 qyzmetshiniń eki jáne odan da kóp joǵary bilimi bar. 73-i nemese 1,7% shetelde bilim alǵan», - dedi Á. Muqashev.
