Aqtóbede 20 jastaǵy jigit sýǵa batyp ketti

AQTÓBE. KAZINFORM — Aqtóbe qalasyndaǵy Qarǵaly ózenine 20 jastaǵy jigit batyp ketti. Ony súńgýirler 2,5 metr tereńdikten tapty.

Oqıǵa qaladaǵy Solnyshko baý-baqsha ujymy aýmaǵynda boldy. 2004 jylǵy jigit sýǵa túsýge ruqsat etilmegen aýmaqqa shomylǵan. 

— Jedel qutqarý jasaǵynyń qutqarýshylary jaǵadan 15 metr qashyqtyqtan, 2,5 metr tereńdikten denesin alyp shyqty. Kún ystyq bolǵanymen sý áli de salqyn. Sýǵa túsken adamnyń sińiri tartylyp qalady. Sondyqtan sýdaǵy qaýipsizdik erejelerin qatań saqtaýǵa shaqyramyz, — dep habarlady oblystyq TJD baspasóz qyzmeti.

Aıta keteıik, Aqtóbede sýǵa túsý maýsymy erteń bastalady. Jalpy oblys boıynsha sýǵa túsýge tyıym salynǵan 200-den astam oryn bar. Onda 300-ge jýyq arnaıy belgi ornatyldy. Sonymen birge TJD qyzmetkeri reıd jasap, sý túbin de tekseredi. Qutqarýshy eriktiler de daıyndalyp, oqytylady. Ásirese balalardyń jazǵy demalysynda túrli demalys oryndary men lagerlerge kezekshilik qoıylady.

Eske salsaq, byltyr oblys aýmaǵynda 11 adam sýǵa ketip kóz jumdy. Onyń toǵyzy bala.