Aqtóbede 20 shaqty saqaldy qurylystyń máselesi qalaı sheshiledi
AQTÓBE. KAZINFORM — Qurylysy uzaqqa sozylǵan nysandar arasynda mektep, mektep-balabaqsha, sport keshenderi men emdeý orny bar. Al kópqabatty úıler máselesi 2017-2018 jyldardan beri jalǵasyp keledi.
Mektep pen sport keshenderiniń jaıy
Aqtóbe oblysyndaǵy barlyq qurylys jumystarynyń quny 468 mlrd teńgeni quraıdy. Buǵan áleýmettik nysandar, turǵyn úı, jol sekildi salanyń bári kiredi. Búginde qarjynyń 212,7 mlrd teńgesi ıgerilip tur. Statıstıka osy.
Turǵyn úıge keler bolsaq, jospary — 1 mln sharshy metr. Bul degenimiz — jeke úıler men memleket satyp alatyn baspanalardyń jalpy aýdany. Qazirgi kezde 501 sharshy metri qoldanysqa berildi.
Sonymen birge 124 áleýmettik nysannyń qurylysy júrip jatyr, taǵy 56 jobalyq-smetalyq qujat ázirlendi. Qurylystyń ishinen problemalar nysandardy bólip alsaq, olardyń sany — 7.
— Eń birinshisi — Shılisaıdaǵy mektep. Bul jerde bastapqy merdigermen arada kelisimshart úzilip, jańa merdiger jumysty aıaqtaıdy. «Babek Qyrylys» JShS-i qazir ishki árleý, jol salý, abbattandyrýǵa jaýapty. Negizi bul mektepte qurylystyń 95% aıaqtalǵan. Biraq birneshe jylǵa sozylǵan soń keıbir sylaq jumystary túsip, qaıta qalpyna keltirýdi talap etti. Joba quny — 1,7 mlrd teńge. Búginde qurylysty aıaqtaýǵa 40 mln teńge jumsalyp jatyr. Ózgeniń bastaǵan isin aıaqtaýǵa kóp kompanııa kelispedi, — dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Shılisaı aýylyndaǵy mektep qurylysy 2018 jyly bastalyp, jobalyq-smetalyq qujaty qaıta jasaqtalǵan.
Qurylys jyl sońynda aıaqtalyp, balalar úshinshi toqsanda osy bilim ordasyna barýy tıis. Ázirge oqýshylar ózge bilim ordalaryna tasymaldanyp jatyr.
— Aqtóbe oblysy Baıǵanın aýdany Oımaýyt aýylynda mektep-balabaqsha qurylysy toqtap tur. Qurylys jumysy 2021 jyly bastalǵan bolatyn. Alaıda merdiger tek jerdi qazyp, qurylys materıaldarynyń bir bóligin tasymaldap qoıdy. Ol jumystarǵa 74 mln teńge bólinip, ıgerilgen. Qazirgi kezde kelisimshart úzilip, jobalyq-smetalyq qujatqa túzetý engizildi. Ázirge jańa merdiger anyqtalmady. Taǵy bir qurylys — Temirbek Júrgenov aýylyndaǵy sport kesheni. Munda da jobalyq-smetalyq qujatyna túzetý engizilip, basseındi qosa salý josparlanyp otyr. Sonymen birge keıbir qurylys bóligi tozǵan. Іshki bóligindegi taqtalary, syrtqy qasbetindegi qaptamalary aýystyrylady, tirek temirler tottan tazartylady. Munda da jańa qurylys kompanııasy keldi. Bıylǵa 167 mln teńge bólindi. Keler jyly qoldanysqa beriledi, — dedi Aslan Jarasbaev.
Sonymen birge Muǵaljar aýdany Qandyaǵash qalasy Samal shaǵyn aýdanyndaǵy mektep qurylysy da áli aıaqtalmady.
Mundaǵy qurylys 2021 jyly bastalyp, búginge deıin jalǵasyp jatyr.
— Kelesi jyly qurylys bitedi. Munda da merdiger jumysty ýaqytyly júrgizbeı, keıin jobalyq-smetalyq qujatyna ózgertýler engizildi. Qaıta eseptelip, qazir qurylysty jalǵastyryp jatyr, — deıdi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Muǵaljar aýdanynda Aşysaı mektebi de problemalyq nysan qatarynda. 60 oryndyq mektep qurylysy 2019 jyly bastalyp, búginge deıin sozyldy. Merdiger ishki árleý jumystaryn jyl sońyna deıin aıaqtaýy tıis.
Sonymen birge Aqtóbe qalasy Altyn orda shaǵyn aýdanyndaǵy múgedektigi bar adamdarǵa arnalǵan sport kesheniniń qurylysy 2021 jyly bastalyp, búginge deıin jalǵasyp jatyr. Munda da joba quny — 1,7 mlrd teńge. Nysan qurylysy bıyl aıaqtalady.
Al «saqaldy qurylys» qataryndaǵy oblystyq týberkýlezge qarsy dıspanser endi ınfektsııalyq korpýsy bar oblystyq aýrýhana bolady. Jobalyq-smetalyq qujatqa túzetý engizilip jatyr. Qurylystyń bastalǵanyna 10 jylǵa jýyqtady.
Qurylysy uzaqqa sozylǵan kópqabatty úı sany — 12
Áleýmettik nysandarǵa qaraǵanda problemalar turǵyn úılerdiń máselesin sheshý qıynǵa soǵyp tur.
Sebebi aldymen kompanııa basshysyna qatysty qylmystyq is qozǵalyp, úkim zańdy kúshine engen soń qurylys júrgizilgen aýmaqtaǵy jerdi memleketke qaıtarý jumysy júrgiziledi. Demek aldymen qylmystyq, keıin is ekonomıkalyq sotta qaralady.
— Aqtóbe oblysynda úlestik qurylystyń 12 nysany bar. Qazirgi tańda 8 qylmystyq iste sot prokýrordyń talabyn qanaǵattandyrdy. Sonymen birge bir is, ıaǵnı, «Stroıservıs-Regıon» turǵyn úı-qurylys kooperatıvine qatysty talap aryzy sotta qaralyp jatyr. Taǵy úsh talap aryz sotqa daıyndalyp jatyr. Negizinen kóp úı 2017-2018 jyldary salynǵan. Qazirgi kezde merdigerler 6-9 jylǵa sottalyp ketti, — dedi Aqtóbe oblystyq qurylys, sáýlet jáne qala qurylysy basqarmasy sáýlet jáne qala qurylysy bóliminiń bas mamany Aıdos Jolamanov.
Aqtóbede úleskerler máselesin sheshý, qurylysty aıaqtaý úshin 2023 jyly «Aqtóbe qurylys kompanııasy-2023» JShS quryldy.
Ereje boıynsha turǵyndardyń, úleskerlerdiń ótinishi Aqtóbe oblysy ákimdigindegi vedomstvoaralyq komıssııada qaralady. Eger komıssııa nysandy problemalyq dep tanysa, qujattar «Aqtóbe qurylys kompanııasy-2023» JShS-ne jiberiledi.
Keıin qurylysty seriktestik baqylaýyna alyp, istiń sot satylarynan ótkenin kútedi. Іs aıaqtalyp, úkim zańdy kúshine engen soń qurylysty aıaqtaý joly qarastyrylady.
— Buǵan deıin «Turǵyn úı qurylysy úlestik qatysý týraly» Zańynda 2-3 qabatty turǵyn úıler máselesi kirmedi. Tamyz aıynyń sońynda bul zańǵa ózgertýler men tolyqtyrýlar engizildi. Endi bul qurylys da baqylaýda bolady. Qazirgi kezde táýekelde turǵan 2-3 nysan bar. Bireýiniń qurylysy aıaqtaldy. Jalpy problemalyq turǵyn úılerdiń qurylysyn 2026-2029 jyldary aıaqtaý josparda, — deıdi Aıdos Jolamanov.
Eske salsaq, byltyr Aqtóbe oblysy boıynsha qurylysy aıaqtalmaı, kidirip qalǵan 31 nysan boldy. Onyń 8-i mektep.