Aqtóbede 20 kún buryn joǵalyp ketken jigit áli tabylǵan joq
AQTÓBE. QazAqparat - 3 tamyz kúni joǵalyp ketken 31 jastaǵy Erhan Tileýmbetov áli tabylǵan joq. Týǵan-týystary, dostary qala mańyndaǵy bazardyń aınalasyn túgel tintip shyǵyp, jaqyn mańdaǵy qaraýsyz qalǵan ǵımarattardy tekserdi, dep habarlaıdy QazAqparat tilshisi.
31 jastaǵy Erhan Tileýmbetovtyń joǵalyp ketkeni týraly habarlap, áleýmettik jeli qoldanýshylarynan kómek suraǵan otbasy áli kúnge deıin odan bir habar ala almaı otyr. Buǵan deıin habarlaǵanymyzdaı, 3 tamyz kúni Erhan Tileýmbetov Aqtóbe qalasyndaǵy 41 razezde ornalasqan kóterme bazarǵa baryp, qarbyz satpaq bolǵan. Sol kezde aq tústi kólik kelip, ony alyp ketken .
Sol kúni keshkilik polıtsııaǵa baryp, aryz jazǵan anasy Raıhan Esenamanova áli kúnge deıin uly týraly birde-bir aqparat ala almaı otyr. Ol jergilikti ákimdikten, prokýratýradan da kómek suraǵan bolatyn.
«Eshqandaı habar joq. Polıtsııa izdeý júrip jatqanyn aıtady. Prokýratýra ókilderi de kelip, izdeýdiń toqtaýsyz júrip jatqanyn jetkizdi.
Beınekameradan alyndan materıal bar, adamnyń sulbasy kórinip tur. Qalanyń ortasyndaǵy bazar ishinda turyp, keıin joǵalyp ketken balamdy taba almaýy múmkin emes. Biz sol mańdaǵy ormandy, ǵımarattardy túgel qarap shyqtyq. Dostary Bestamaq aýyly mańyndaǵy qaraýsyz, ıesiz qalǵan nysandardy tekserdi. Eshteńe joq. Óte aýyr jaǵdaı, kún ótken saıyn qorqynysh basym bolyp barady»,- dedi R.Esenamanova.
Aıta keteıik, Aqtóbe oblystyq ІІD baspasóz qyzmeti izdeý jumystary keshendi júrip jatqanyn, ári qaraı jalǵasatynyn jetkizdi.
