Aqtóbede 2 myń bos jumys orny bar
Aqtóbede densaýlyq saqtaý, bilim, taý-ken óndirý, aýyl sharýashylyǵy salasyna túrli bilikti maman qajet. Bul týraly Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Bıbigúl Bısenǵalıev «Aqtóbe» telearnasynyń «Sáti túsken suhbat» baǵdarlamasynda aıtyp berdi. Mamannyń málimetine súıensek, byltyr Jastar tájırıbesimen eńbekke aralasqandardyń 80% astamy qyzmetke turaqty ornalasty.
«Halyqty jumyspen qamtýda «Eńbek« baǵdarlamasynyń kómegi kóp boldy. Bul jumyspen qamtýǵa, jumyssyzdardyń kásippen aınalysýyna septigin tıgizdi. Ótken jyly 56 myńnan astam adam túrli baǵdarlamalarǵa tartyldy. Atap aıtqanda 1380 adam kásipkerlik negizderin oqydy. Al 1500 adam «Bıznes bastaý« jobasynyń múmkindigin paıdalandy. Onyń 600-den astamy qaıtarymsyz grantqa ıe bolyp, 40-y shaǵyn nesıe ıemdendi. Byltyr qaıtarymsyz grant 200 AEK kóleminde berilgeni belgili. Sonymen birge bos jumys oryndaryna 34 myńnan astam adam ornalastyryldy. Budan basqa ýaqytsha sıpattaǵy áleýmettik jumys oryndaryna 11 myńnan astam tartyldy. 1700 adam áleýmettik jumysqa ornalasty. Jastar tájirıbesine 2500-den astamy bardy. Sonymen birge Urpaqtar sabaqtastyǵy jáne Alǵashqy jumys orny jobasy bar. Alǵashqysyna 88, keıingisine 90 adam tartyldy. Oblystyq statıstıka departamentiniń málimetine súıensek, jumyssyzdyq deńgeıi 4,8% qurady»,- Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Bıbigúl Bısenǵalıeva.
Qazirgi kezde Aqtóbede 2 myńnan astam bos jumys orny bar. Al jumyssyzdar 21 myńnan asady. Olar zeınet jasyna jaqyndaǵan adamdar, jastar men orta jastaǵy aqtóbelikter.
«Bıyl memlekettik baǵdarlamalarda ózgeris bar. «Kúmis jas« aıasynda zeınetke jaqyndaǵan adamdar eńbekke aralasady. Al kópbalaly otbasy, ataýly áleýmettik kómek alatyndar men múgedekter, múgedek bala tárbıelep otyrǵan adamdar 1 mln teńgeden astam qarjy qaıtarymsyz grant ıelene alady»,- dedi Bıbigúl Bısenǵalıeva.
