Aqtóbede 2,5 myń teńgeniń daýynan soń ólimmen aıaqtalǵan qylmystyq iske núkte qoıyldy
AQTÓBE. QazAqparat - Aqtóbede 32 jastaǵy tórt balanyń ákesi Áset Orazbaıdyń ólimimen aıaqtalǵan oqıǵaǵa qatysty sot úkim shyǵardy, dep habarlaıdy QazAqparat tilshisi.
Aqtóbe qalasyndaǵy kafeniń birinde bolǵan oqıǵa týraly buǵan deıin habarlaǵan bolatynby z. Áset Orazbaı dámhanada kúzetshi bolyp jumys istep júrgen kezde Marat Abdýllın áriptesi Artýr Bereketovti janyna ertip, tapsyrys beredi. Ystyq tamaqtyń aqysyn tólep, taǵy ishimdik suratqan kezde 2555 teńgeleri jetpeı qalady. Aqyny tólemeıtinderin aıtyp, daıashyny keri qaıtarǵan ekeýi sol kúıi dalaǵa shyǵyp ketedi. Sońynan ere shyqqan Áset Orazbaıdy sol jerde uryp, keıin kólikpen qaǵyp ketpek bolady.
Aıyptaý qorytyndysyna súıensek, Áset Orazbaı kólikke jarmasyp, birneshe metr júgirgen. Sol kezde kólik rólinde otyrǵan Artýr Bereketov jyldamdyqty asyryp, júrip ketedi. Jábirlenýshi oqıǵa ornynda qaza bolǵan. Іs boıynsha Marat Abdýllın «buzaqylyq», Artýr Bereketov «abaısyzda kisi óltirý» baby boıynsha aıypty dep tanyldy.
Aıyptalýshy Marat Abdýllın eki jylǵa, al Artýr Bereketov 3 jylǵa bas bostandyǵynan aıyryldy. Eki sottalýshy jábirlenýshi tarapqa 3 mıllıon teńge moraldyq jáne materıaldyq shyǵyn tóleýi tıis.
«Biz sot sheshimimen kelispeımiz. Appelıatsııalyq shaǵym túsirip, qajet bolsa Joǵary sotqa aryz jazamyz. Sot kezinde qasaqana kisi óltirgeni dáleldenbedi dep aıtyp jatyr. Bir úıdiń asyraýshysyn, tórt balanyń ákesin óltirgen adamǵa qatysty tergeý jumysy durys júrgizilmedi. Olar jeńil jaza alyp otyr»,- dedi qaza bolǵan Áset Orazbaıdyń kelinshegi Gúlnar Orazbaeva.
