Aqtóbede 19 jastaǵy qyzdyń ólimine sebepker bolǵan júrgizýshi aýrýhanadan shyqty
AQTÓBE. QazAqparat - Aqtóbede 19 jastaǵy Sıýzanna Gamıdovanyń ólimine sebepker bolǵan júrgizýshi aýrýhanadan shyqty. Onyń ómirine eshqandaı qaýip tónip turǵan joq, dep habarlaıdy QazAqparat tilshisi.
«Jol-kólik oqıǵasy kezinde zardap shekken naýqas eki apta boıy em qabyldap, aýrýhanadan shyǵaryldy. Ol keýde, jabyq bas-mı jaraqatyn alyp, emdeldi. Naýqas emin ýchaskelik emhanada jalǵastyra alady»,- dedi oblystyq jedel járdem aýrýhanasy, polıtravma bóliminiń meńgerýshisi Jaqııa Baızýllın. Dárigerlerdiń aıtýynsha, júrgizýshi travmatolog, nevropatolog, terapevttiń qadaǵalaýynda bolady.
Eske salsaq, 7 shilde kúni Tuńǵysh Prezıdent atyndaǵy ortalyq saıabaqta jol apaty bolyp, oqıǵa ornynda 19 jastaǵy Sıýzanna Gamıdova qaza tapty. Al 19 jastaǵy jigit birneshe dene jaraqatymen oblystyq jedel járdem aýrýhanasyna túsip, otadan soń Qostanaı oblysyna, óz turǵylyqty jerine em qabyldaýǵa ketti .
Aıta keteıik, Aqtóbe oblystyq ІІD baspasóz qyzmeti osy oqıǵaǵa qatysty qandaı da bir aqparat berýden bas tartyp otyr.
