Aqtóbede 19 jastaǵy qyzdyń ólimine sebepker bolǵan stýdent sotta jylady
AQTÓBE. QazAqparat - Aqtóbedegi saıabaqta serýendep júrip, qatty kelgen kóliktiń astynda qalǵan Sıýzanna Gamıdovanyń ólimine qatysty qylmystyq is qaralyp jatyr. Búgin memlekettik aıyptaýshy sottalýshy Sezim Samuratty 2 jyl 6 aıǵa bas bostandyǵynan aıyrý jazasyn taǵaıyndaýdy surady, dep habarlaıdy QazAqparat tilshisi.
«Sottalýshy Sezim Samurat saıabaqta júrgen Sıýzanna Gamıdovany, Maqsut Anapındi basyp ketti. Kólik oqıǵasy kezinde Gamıdova kóz jumdy, Anapın Aqtóbe qalalyq jedel-járdem aýrýhanasyna jetkizilip, densaýlyǵyna orta dárejedegi zııan keltirildi. Sottalýshy ózine taǵylǵan aıyppen kelisip, ókinetinin jetkizdi. Sot-medıtsınalyq saraptama nátıjesinde Gamıdovanyń bas-mı jaraqaty kezinde qaza bolǵany anyqtaldy. Jazany jeńildetý kezinde shyn nıetimen ókinýi, jábirlenýshi tarapqa materıaldy zalaldy óteýi, buryn sottalmaýy, jaqsy minezdeme berilgeni eskerilgeni durys. Jol apaty kezinde Gamıdova qaza boldy, Anapın aýyr jaralandy. Sezim Samuratqa 5 jyl merzimge kólik quralyn basqarý quqynan aıyra otyryp, 2 jyl 6 aı merzimge bas bostandyǵynan aıyrý jazasyn taǵaıyndaýdy suraımyn. Jazasyn qaýiptiligi tómen túzetý mekemesinde óteýdi belgilep, sot zalynan qamaýǵa alýdy suraımyn», - dedi memlekettik aıyptaýshy Eldar Abıev.
Eske salsaq, 7 shilde kúni keshkilik Aqtóbe qalasyndaǵy Tuńǵysh Prezıdent atyndaǵy saıabaqta jol-kólik oqıǵasy bolyp, 19 jastaǵy Sıýzanna Gamıdova qaza boldy . Sol kúni sottalýshy Sezim Samurat saǵatyna 60 shaqyrym jyldamdyqpen júrýi tıis bolatyn. Biraq ol saǵatyna 91 shaqyrymmen júrip, janyna kelgen kólikpen qoryqty, sóıtip saıabaqtaǵy júrginshiler jolyna ótip ketti. Kelesi aptada sottalýshy Sezim Samurat sońǵy sózin aıtady. Ol búgin kózine jas alyp, shyn ókinetinin jetkizdi. Jábirlenýshi tarap keshirim berip, bas bostandyǵynan aıyrý jazasyn taǵaıyndamaýdy ótingen edi.
