Aqtóbede 19 kásiporynnyń jumysy toqtap tur
AQTÓBE. KAZINFORM – Aqtóbe oblysynda 19 kásiporynnyń jumysy toqtap tur. Qurylys, tamaq jáne óńdeý ónerkásibi salalaryn qamtyǵan kásiporyndar oblys ortalyǵy men birneshe aýdanda ornalasqan.
Kazinform tilshisi Aqtóbe oblystyq ındýstrııalyq-ınnovatsııalyq damý basqarmasynyń basshysy Asqar Ábishevke saýal joldap, 19 kásiporynnyń qaı baǵytta jumys istegenin bildi. Kásipkerler qurylys, tamaq jáne óńdeý ónerkásibi salalaryndaǵy ónimdi ótkize almaǵan.
- Osy jyldyń basynda oblys boıynsha básekege qabilettiliktiń tómendigine, qurylys, tamaq jáne óńdeý ónerkásibi salalaryndaǵy ónimdi ótkizýdiń jetkiliksizdigine baılanysty jumysy toqtatylǵan 19 kásiporyn tirkeldi. (Aqtóbe qalasy - 4, Alǵa aýdany - 3, Áıteke bı aýdany - 1, Qarǵaly aýdany - 5, Mártók aýdany - 3, Hromtaý aýdany - 2, Shalqar aýdany - 1). «Hobas Pipes Kazakhstan» JShS-i 2003 jyly qurylǵan. Polıefırmen nyǵaıtylǵan shyny talshyqty qubyrlar men fıtıngter shyǵardy. Al «Aqtóbe metal emes qubyr zaýyty» AQ-y 2005 jyly qurylǵan. Polıefırli, epoksıdti, vınılefırli shaıyrlar men kvartsty qum negizindegi shyny talshyqty qubyrlar shyǵardy. «Aqtóbe Jylyjaı» JShS-i 2014 jyly qurylǵan. Qyzanaq pen qııardy az kólemdi gıdroponıkalyq tehnologııa ádisimen ósirdi. «ANDI» JShS-i 2011 jyly ashyldy. Sút ónimderin óndirdi. Osy tórt kásiporyn Aqtóbe qalasynda ornalasqan. Alǵa aýdanyndaǵy qus fabrıkasy, polıpropılen qaptaryn óndiretin tseh, Mártóktegi et pen sútti qaıta óńdeıtin «Alǵabas» JShS-niń jumysy toqtap tur. Katodty mys jáne mys, temir kenderin, kobalt-nıkel kenderi, qońyr kómir óndirý, fraktsııalyq qıyrshyq tasty shyǵarý, kirpish óndirisi de tizimde bar,- dep habarlady Aqtóbe oblystyq ındýstrııalyq-ınnovatsııalyq damý basqarmasynyń basshysy Asqar Ábishev.
Basqarma basshysy negizgi sebebin jabdyqtardyń eskirip, tehnologııalyq kemshilikter jiberilgen dep esepteıdi. Sonymen birge qarjylyq qıyndyqtar týyndap, aınalym qarjysy jetpegen. Ónimdi satý da qıynǵa túsken.
- Atalǵan kásiporyndardyń jumysy toqtaǵan soń shamamen 270 jumys orny bosatyldy. Toqtap turǵan kásiporyndardy qalpyna keltirý maqsatynda turaqty negizde ishki jáne syrtqy ınvestorlardy izdeý jumystary júrgizilip jatyr. Máselen jyl basynda «Aqtóbe metal emes qubyra zaýyty» AQ-niń (shyny talshyqty qubyrlar) toqtap turǵan ǵımaratyn jergilikti «FIBC Kazakhstan» JShS-i (polıpropılennen jumsaq konteınerler, vagon tósemderin óndirý) qoldanystaǵy óndiristi odan ári keńeıtý úshin satyp aldy. Sondaı-aq «HOBAS Pipes Kazakhstan» JShS-niń ǵımaratyn «BATYS MJBK» JShS-i satyp aldy. Bul kompanııa búginde jaıaý júrginshiler kópirleriniń tirekteri men jıekteriniń qurama temirbeton bólshekterin shyǵarady. Bıyl tórtinshi toqsanda ónim assortımentin keńeıte otyryp, qosymsha tsehtar salý josparlap otyr. Sonymen qatar búginde árbir toqtap turǵan kásiporyndy reanımatsııalaý boıynsha Jol kartasynyń jobasy ázirlendi,- dep habarlady Asqar Ábishev.
Aıta keteıik, Aqtóbede bıyl Aqtóbe ferroqorytpa zaýytynyń №1 balqytý tsehyn jańǵyrtý, Temir kenderin qurǵaq magnıtti separatsııalaý fabrıkasyn salý, Usaq bólshekterdi óndirý tsehyn salý, Júndi bastapqy óńdeý jáne toqyma emes materıaldardy daıyndaý boıynsha tseh salý, Maıly daqyldardy óńdeýge arnalǵan astyq qoımasyn salý ınvestıtsııalyq jobalary iske asyrylýy tıis. Investıtsııanyń jalpy somasy shamamen 27,5 mlrd teńgeni quraıdy. Shamamen 300-ge jýyq jumys ornyn qurylady.
Eske salsaq, Aqtóbede egin orý jumysy júrip jatyr. Alǵa aýdanyndaǵy dıqan gektarynan 20-25 tsentner ónim aldy.
