Aqtóbede 1,9 gektar paıdalanylmaǵan jer telimi memleket menshigine qaıtaryldy
ASTANA. KAZINFORM — Jer ıesine jer telimin ıgerý týraly tıisti nusqama berilgen, alaıda ol oryndalmaǵan.
Aqtóbe oblysynyń jer resýrstaryn basqarý departamentimen júrgizilgen jospardan tys tekserý barysynda, Aqtóbe qalasynda ornalasqan jalpy kólemi 1,9 gektar bolatyn, nysanaly maqsaty «kóp qabatty turǵyn úıler salý úshin» berilgen jer teliminiń uzaq ýaqyt boıy nysanaly maqsatyna saı paıdalanylmaı bos jatqandyǵy belgili boldy.
Aýyl sharýashylyǵy mınıstrliginiń málimetinshe jer ıesine jer telimin ıgerý týraly tıisti nusqama berilgen, alaıda ol oryndalmaǵan. Ákimshilik jaýapkershilikke tartqannan keıin, departament tarapynan jer ýchaskesin májbúrli túrde alyp qoıý týraly sotqa talap-aryz berildi.
Nátıjesinde, Aqtóbe oblysynyń mamandandyrylǵan aýdanaralyq ekonomıkalyq sotynyń sheshimimen departamenttiń talap-aryzy tolyqtaı qanaǵattandyrylyp, jer telimi memleket menshigine qaıtaryldy.
Osy oraıda, AShM JRBK árbir jer ıesi men jer paıdalanýshyǵa ózderine tıesili jerlerdi nysanaly maqsatyna saı ári tıimdi paıdalaný, sondaı-aq barlyq zań buzýshylyqtardyń aldyn alý qajettigi jóninde eskertedi.
Aıta ketelik Qazaq veterınarııa ınstıtýtynyń jer ýchaskesi óz menshiginde qalady.
