Aqtóbede 19 aýyldy qum basý qaýpi tónip túr
Aqtóbeniń tórt aýdanynda 19 aýyldy qum basý qaýpi tónip tur. Qazirgi kezde qum toqtatý úshin tal egýmen qatar qamystan qorǵan jasaý joly qarastyrylyp jatyr, dep habarlaıdy Kazinform.
Aqtóbede qum toqtatý jumystary úshin 2021-2026 jyldarǵa arnalǵan joba daıyndalǵan. Alaıda jumys mardymsyz bolyp tur. Qazirgi kezde Shalqar aýdanynyń Jyltyr aýylyn qum qorany ǵana emes, úılerdi de basyp jatyr.
«Saraıǵa kire almaımyz. Monshanyń esigin qaıta-qaıta bitep tastaıdy. Buryn sý qubyryn júrgizetin adamdar kelgen. Solarǵa qoıymyzdy berip, tazartyp aldyq. Biraq mardymsyz. Bes jyl boldy, alysyp kelemiz. Kir jýsaq, kıimimiz topyraq bolady. Qurt ta jaıa almaımyz»,- dedi Lena Bekjan.
Halyq óz kúshimen aǵash ta egip kórdi. Biraq bári qýrap qaldy.
«Kógaldandyrý, qum toqtatý úshin qara sekseýilmen qatar 7-8 túrli aǵash egiledi. Sekseýilge basymdyq beriledi. Mekeme jylyna 2 myń gektardaı jerge aǵash, sekseýil egedi. Egetin materıal jetkilikti. Shalqar aýdanynyń Jyltyr aýylyndaǵy problemanyń kóterilgenine kóp jyl ótti. Aǵashqa qum toqtamaıdy. Qamystan órý kerek. Ekkennen keıingi kútimi mańyzdy. Ákimdikte 4-5 adamnan basqa jumys kúshi joq. Myńdap egilse, sýarý múmkin bolmaıdy. Biraq Jyltyr aýylynyń halqy belsendi, ózderi kómektesedi», - dedi «Uly Borsyq» orman sharýashylyǵy jáne janýarlar dúnıesin qorǵaý jónindegi mekemeniń dırektory Isataı Kónekbaev.
Qazir oblysta eki aýdannyń úsh aýylynda qum toqtatý jumysy júrip jatyr. 2022 jyly Yrǵyz aýdanynyń Jarma aýylyndaǵy qumdy toqtatý úshin 119 mln tg bólindi. Qorshap, ony qamyspen órý mindetteldi. Aýmaǵy 11 ga bolady. Jumysty 2026 jylǵa deıin aıaqtaý josparda bar. Sonymen birge Baıǵanın aýdanynda eki aýylda qum toqtatý úshin merdiger anyqtaldy. Qorshaýdan soń tal etiledi. Mundaǵy 21gektar jerge qorshaý salynady. Keler jyly kóktemde tal egý jumysy atqarylady. Alaıda merdigerler kúzde egýdi josparlap qoıǵan.
«Shalqar aýdanynyń Aıshýaq aýylynda qum toqtatý jumysy atqarylyp, nátıje berdi. Qazir Jyltyr aýylynda qum toqtatý jumysy úshin 2 qudyq qazyldy. Bul ekken taldy sýarýǵa múmkindik beredi. 2024 jyly sol jerge 35 myń túp sekseýil egemiz. Qaraǵash ta egiledi. Jalpy, Aqtóbe oblysynda 19 aýylda qum kóshkini bar. Olar Temir, Yrǵyz, Shalqar, Baıǵanın aýdandarynda ornalasqan. 2026 jylǵa deıin barlyq aýylda osyndaı jumys atqarylady»,- dedi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Sábıt Dúısekenov.
Aqtóbe oblysy boıynsha áli 16 aýylǵa qajetti jobalyq-smetalyq qujat joq.
