Aqtóbede 188 stýdent oblys ákiminiń stıpendııasyn ıelendi
Oblysta Jastar isi jónindegi keńestiń otyrysy ótti. Jastar kásipkerligin damytý, Shalqar aýdanynda jastar saıasatyn júzege asyrý jáne stýdentterdi shákirtaqymen qamtamasyz etý máseleleri qaraldy. Otyrys barysynda oblys ákimi jastardy jan-jaqty qoldaý boıynsha birqatar tapsyrma berdi.
Atap aıtqanda, oblystyq energetıka jáne turǵyn úı-kommýnaldyq sharýashylyǵy, ekonomıka jáne bıýdjettik josparlaý, ishki saıasat basqarmalaryna Aqtóbe qalalyq ákimshiligimen birlesip, bıyl qazan aıyna deıin óńirdegi jergilikti jastarǵa arnalǵan jeńildetilgen ıpotekalyq baǵdarlamany iske qosý múmkindigin pysyqtaý tapsyryldy. Budan bólek, oblys ákimi belsendi jastardyń bastamalaryn qoldaý maqsatynda Memleket basshysynyń bastamasymen qolǵa alynǵan «Táýelsizdik urpaqtary» jobasyn óńirde jyl sońyna deıin júzege asyrýdy tapsyrdy.
«Prezıdent Qasym-Jomart Toqaev barshańyzǵa jaqsy tanys «Táýelsizdik – eń qymbat» atty maqalasynda daryndy jastardy qoldaýǵa kóńil bóldi jáne osy baǵytta birqatar tapsyrma da berdi. Olardyń qatarynda sapaly bilim berý, áleýmettik máselelerdi sheshý, sonyń ishinde turǵyn úımen qamtamasyz etý máselesi de bar. Biz óz kezeginde jastar tarapynan úlken áleýmettik jáne azamattyq belsendilikti kútemiz», - dep atap ótti oblys ákimi Ońdasyn Orazalın.
Jalpy ataýly stıpendııa taǵaıyndaýda óńirde volonterlyq qyzmettiń damýyna úles qosyp júrgen erikti jastarǵa jáne týǵan ólkeniń damýy úshin qoǵamdyq jumystarǵa belsendi qatysyp jýrgen stýdentterge múmkindik berildi. Sonymen birge áleýmettik osal toptaǵy jastar men ozat stýdentter bar. Joǵary oqý oryndary men kolledjderden ótinish bildirgen 300-den astam úmitker stýdenttiń arasynan ataýly stıpendııany taǵaıyndaý jónindegi komıssııa 188-in iriktep aldy. Otyrys sońynda joǵary jáne kásiptik-tehnıkalyq oqý oryndarynyń on úzdik stýdentine sertıfıkat tabystaldy.
