Aqtóbede 188 adam ýlanǵan meıramhananyń zańsyz jumys istegeni belgili boldy
ASTANA. KAZINFORM — Aqtóbe oblysynyń Muǵaljar aýdanynda bolǵan jappaı taǵamnan ýlaný saldarynan 188 adam zardap shekti. Onyń 15-i — 14 jasqa deıingi balalar.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málim etti.
Onyń aıtýynsha, qazir 177 adam aýrýhanaǵa jatqyzylǵan, 11 adam ambýlatorııalyq em alyp jatyr. Barlyq naýqastyń jaǵdaıy ortasha aýyr dep baǵalanyp otyr.
— Aldyn ala epıdemıologııalyq tekserý nátıjesine qaraǵanda, jappaı ýlanýǵa 2026 jylǵy 18–20 maýsym aralyǵynda Muǵaljar aýdanyndaǵy meıramhanalardyń birinde ótken is-sharalarda daıyndalǵan taǵamdar sebep bolǵan, — dedi Sarhat Beısenova.
Spıkerdiń aıtýynsha, zerthanalyq tekserý kezinde taǵamnan, alynǵan synamalardan jáne qyzmetkerlerden ishek ınfektsııasyn týdyratyn bakterııalar tabylǵan.
— Tekserý barysynda sanıtarııalyq talaptardyń óreskel buzylǵany belgili boldy. Atap aıtqanda, nysanda sanıtarııalyq qorytyndy bolmaǵan, taǵamdy daıyndaý men saqtaý talaptary saqtalmaǵan, tehnologııalyq úderister buzylǵan. Sonymen qatar qyzmetkerlerdiń jeke gıgıenany saqtamaǵany jáne mindetti medıtsınalyq kitapshasyz jumys istegeni anyqtaldy, — dedi komıtet tóraǵasy.
Onyń aıtýynsha, qazir atalǵan nysannyń qyzmeti toqtatyldy. Oqıǵaǵa baılanysty sotqa deıingi tergep-tekserý bastaldy. Epıdemıologııalyq tekserý jalǵasyp jatyr.
Aıta keteıik, Qandyaǵashtaǵy meıramhanada ótken toıdan keıin 188 adam taǵamnan ýlanyp, osy derek boıynsha qylmystyq is qozǵalǵan bolatyn. Keıin sanıtarııalyq talaptardyń óreskel buzylǵany anyqtalyp, sot sheshimimen meıramhananyń qyzmeti ýaqytsha toqtatyldy.
