Aqtóbede 18 jastaǵy sportshyny atyp ketti
AQTÓBE. QazAqparat – Aqtóbe qalasynda 18 jastaǵy sportshyny atyp ketti, dep habarlaıdy QazAqparat tilshisi.
Aqtóbe qalasynda kıokýshınkaı karateden Azııa Kýboginiń ıegeri Dáýlet Haırollany atyp ketti. Bul oqıǵaǵa qatysty oblystyq polıtsııa departamenti baspasóz qyzmetiniń jetekshisi Erbolat Sarqulov shaǵyn aqparat taratty.
«4-aqpan kúni bir top jas tanys qyzdyń týǵan kúnin atap ótý úshin qalanyń eski bóliginde úıdi jaldaǵan. Shara barysynda jastar arasynda qaqtyǵys bolyp, onyń saldarynan atys qarýyn qoldaný arqyly kisi óltirý deregi tirkeldi. Jedel-izdestirý sharasy barysynda kúdikti anyqtalyp, ustaldy. Ol kisi óltirgenin tolyq moıyndap, qylmys quralyn jasyrǵan jerdi kórsetti. Kisi óltirý faktisi boıynsha QR QK 99-babymen sotqa deıingi tergeý júrgizilip jatyr. Kúdikti Aqtóbe qalasyndaǵy ýaqytsha ustaý ızolıatoryna qamaldy», - dep jazylǵan baspasóz habarlamasynda.
Aıta keteıik, kóz jumǵan Dáýlet Haırolla Aqtóbe qalasynyń turǵyny. Ol mektep bitirgen soń sport salasyn tańdap, joǵary oqý ornyna tústi. Kishkentaı kezinen sportty serik etken bozbala oblystyq qurama sapynda boldy.
«Qazaqstan birinshiliginiń kúmis júldegeri, Azııa Kýboginiń ıegeri, Qazaqstan Kýboginiń ıegeri, qońyr belbeý ıegeri. 18 jastaǵy jigit birer kúnnen soń Qazaqstan Kýbogine barýy tıis edi.
«El namysyn qorǵar úzdik sportshymyzdan aıyrylyp qalǵanymyzdy búgin tańda estidim», - dedi oblystyq dene shynyqtyrý jáne sport basqarmasynyń basshysy Evgenıı Goncharov.
Dáýlet Haırollany 2013 jyldan beri Álisher Qulyntaı jattyqtyrdy. Qaıǵyly oqıǵany estigende eseńgirep qalǵanyn aıtty jattyqtyrýshy.
«Dáýlet komandanyń úzdigi boldy. Kóp úmit artyp edik. Ózge zamandastaryna úlgi bolǵan sportshydan qapyda aıyrylyp qaldyq. Baýyrmal, ashyq minezdi jigittiń ortamyzda joq ekenin estigende qatty qaıǵyrdym», - dedi ol.
