Aqtóbede 18 myńnan astam otbasyna «Birgemiz» qorynan kómek kórsetildi

AQTÓBE. QazAqparat - Aqtóbede kópbalaly, az qamtylǵan otbasylar, І,ІІ,ІІІ toptaǵy múgedekter, 16 jasqa deıingi múgedek balalardy tárbıelep otyrǵan otbasylarǵa «Birgemiz» qory kómektesti, dep habarlaıdy QazAqparat tilshisi.

Sybaılas jemqorlyqqa qarsy departamenttiń «Antikor Live» jobasy aıasynda «Aqtóbe – adaldyq alańy» jobalyq keńsesiniń basshysy Janbolat Turtaev «Nur Otan» partııasy Aqtóbe oblystyq fılıaly tóraǵasynyń birinshi orynbasary Erbol Danaǵulovpen «Respýblıkalyq «BIRGEMIZ» qorynan bólinetin 50 myń teńge járdemaqy» taqyrybynda kezdesý ótkizdi.

«Birgemiz» qoǵamdyq qory Elbasy Nursultan Nazarbaevtyń bastamasymen quryldy. Qorǵa bıznes ókilderi óz erikimen qarjy aýdardy. Sol aqsha halyqtyń áleýmettik álsiz toptaryn qoldaýǵa jumsalýda. Kómek alýshylar arasynda talas bolmas úshin memlekettik organdardyń resmı derekterine súıendik. Barlyq kómek qolma-qol berilmedi, adamdardyń esepshotyna aýdaryldy. Bul ashyqtyq men aıqyndyqty kórsetedi», - dedi Erbol Danaǵulov.

Elbasy bastamasymen qurylǵan qorǵa búginde kásipkerlerden 23,5 mıllıard teńgeden astam qarjy túsken. Erbol Danaǵulovtyń aıtýysha, Aqtóbe qalasynda kópbalaly, az qamtylǵan otbasylar, І, ІІ, ІІІ toptaǵy múgedekter, 16 jasqa deıingi múgedek balalardy tárbıelep otyrǵan otbasylar, eń tómengi zeınetaqy alatyn jáne halyqtyń áleýmettik jaǵynan osal toptarynyń tizimine kiretin jandar aldy. Jasy boıynsha zeınetke shyqqandar men jetim balalar, UOS qatysýshylar jáne olarǵa teńestirilgen múgedekter, tyl eńbekkerleri jalpy eseppen 18 500-ge jýyq otbasy qoldaýǵa ıe boldy.