Aqtóbede 18 aýylǵa gaz barady

AQTÓBE. QazAqparat - Aqtóbe oblysynda «Qutty meken» jobasy aıasynda 18 aýylǵa gaz tartý jumystary júrgiziledi, dep habarlaıdy QazAqparat tilshisi.

Búgin «Nur Otan» partııasynyń oblystyq fılıalynda kezekten tys konferentsııa ótti. Onyń barysynda partııanyń birqatar áleýmettik jobalary talqylandy. Olardyń arasynda jumyspen qamtý jáne kópbalaly analarǵa kómek kórsetý máseleleri bar.

«Qutty meken» jobasy oblys turǵyndaryn ınjenerlik jáne áleýmettik ınfraqurylym nysandarymen qamtýǵa baǵyttalǵan. Bıyl 7 myńnan astam adamdy qamtıtyn 18 eldi mekendi gazdandyrý jumystary bastalady. Al aýyzsýmen qamtý boıynsha 21 jobaǵa 3,8 mlrd teńge bólindi. Bul 4,5 myńǵa jýyq aqtóbelikti qosymsha sapaly aýyzsýmen qamtamasyz etýge múmkindik beredi. Oblysta 16 jańa mektep salynyp jatyr. Onyń 15-i osy jyly paıdalanýǵa beriledi. Jalpy, gazdandyrý, sýmen jabdyqtaý, mektep salýǵa qatysty 48 joba bar. Olardy iske asyrý úshin mınıstrliktermen jumys atqarylyp jatyr», - dedi Aqtóbe oblysy ákiminiń orynbasary Oljas Smaǵulov.

Konferentsııa kezinde «Baqytty otbasy» partııalyq jobasynyń iske asyrylý jaıy aıtyldy. Máselen, Aqtóbe oblysy boıynsha buǵan deıin 2700 otbasy ataýly áleýmettik kómek alsa, endi olardyń qatary 6 myńǵa jetti. Bul jumystar úshin bıýdjetten qosymsha 3,5 mlrd teńge bólinedi. Az qamtylǵan azamattarǵa birjolǵy áleýmettik kómek 2 esege ulǵaıdy. Ol buryn 70 myń teńge bolsa, qazir 140 myń teńge.

«Kópbalaly otbasylar úshin turǵyn úıdiń bastapqy jarnasy sýbsıdııalanady. Az qamtylǵan otbasy balalaryn mektepterde 100% ystyq tamaqpen qamtamasyz etý josparlanǵan. Barlyǵy - 17,2 myń bala. Sonymen qatar 3 myń adam qaıta oqytylyp, 5 myń adam jumysqa ornalastyrylady. Bıyl halyqtyń áleýmettik osal toptaryna 720 páter beriledi. Oǵan qosymsha 3 mlrd teńge bólinedi. Sondaı-aq 3 jyl ishinde jyl saıyn bıýdjetten tys qarjy esebinen 110 páter beriledi», - dedi Oljas Smaǵulov.

Al «Aýyl - el besigi» jobasy aıasynda Qarǵaly, Temir, Mártók aýdanynyń ortalyqtarynda dene shynyqtyrý-saýyqtyrý kesheni salynady. Jalpy aýyldardyń ınfraqurylymyn jańartý úshin oblysqa 1,2 mlrd teńge bólingen. Sonymen qatar bıyl «Dıplommen aýylǵa» jobasy aıasynda 600 jas maman memlekettik qoldaýǵa ıe bolady. Budan bólek, «Eńbek» baǵdarlamasy aıasynda aýylǵa 3,9 mlrd teńge bólindi. ıAǵnı, 1 myń jańa jobany júzege asyrýǵa múmkindik bar.

«Halyqqa kómek» jobasy aıasynda Aqtóbeniń barlyq aýdanynda Halyqtyq keńse ashylatyn boldy. Aqtóbe qalasyndaǵy Halyqtyq keńse 600-den astam qyzmet túrin kórsetedi.

Aıta keteıik, jıyn sońynda «Nur Otan» partııasynyń HІH sezine oblystan delegattar saılandy.