Aqtóbede 17 shaqyrym jylý jelisi men 300 shaqyrym elektr jelisi jańǵyrtylady
ASTANA. KAZINFORM — Aqtóbe oblysyndaǵy jylý jelileriniń jalpy uzyndyǵy 416 shaqyrymdy quraıdy, olardyń ortasha tozý deńgeıi — 39,3%, dep habarlaıdy Energetıka mınıstrliginiń baspasóz qyzmeti.
Energetıka mınıstrligi Memlekettik energetıkalyq qadaǵalaý jáne baqylaý komıtetiniń tóraǵasy Erjan Ertaev Aqtóbe oblysyndaǵy jylý jáne elektr energetıkasy nysandarynyń aldaǵy kúzgi-qysqy kezeńge daıyndyq barysymen tanysty. Jumys sapary aıasynda komıtet tóraǵasy «Aqtóbe JEO» AQ-da bolyp, jóndeý naýqanynyń ótýi men negizgi jabdyqtardyń jylytý maýsymyna daıyndyǵyn qarady. Bıyl kásiporynda úsh qazandyq agregatyn jóndeý josparlanǵan, onyń bireýi aıaqtalǵan. Sondaı-aq tórt týrboagregatqa jóndeý júrgizý kózdelgen, onyń bireýi de tolyq aıaqtaldy. Stantsııa basshylyǵyna jóndeý jumystaryn belgilengen merzimde aıaqtaý jáne olardyń sapasyna óndiristik baqylaýdy kúsheıtý tapsyryldy.
Aqtóbe qalasynyń edáýir bóligin jylýmen qamtamasyz etetin «Aqtobe su-energy group» AQ nysandaryna erekshe nazar aýdaryldy. «Batys» jáne «Nur Sıtı-2» qazandyqtaryn aralaý barysynda jabdyqtarmen qamtamasyz etilý jáne jóndeý jumystarynyń oryndalý barysy qaraldy.
Sondaı-aq komıtet tóraǵasyna jylýmen jabdyqtaý nysandaryn jedel basqarýdy jáne jylý jelileriniń jaı-kúıin baqylaýdy júzege asyratyn ortalyq dıspetcherlik qyzmettiń jumysy tanystyryldy. Aqtóbe oblysyndaǵy jylý jelileriniń jalpy uzyndyǵy 416 shaqyrymdy quraıdy, olardyń ortasha tozý deńgeıi — 39,3%. Bıyl Aqtóbe qalasynda 17,6 shaqyrym jylý jelisin jóndeý josparlanǵan.
Budan bólek, Ulttyq joba aıasynda jalpy uzyndyǵy 5,2 shaqyrym bolatyn jylý ınfraqurylymyn jańǵyrtýǵa baǵyttalǵan tórt joba iske asyrylyp jatyr. Olardy júzege asyrý nátıjesinde 2030 jylǵa qaraı jylý jelileriniń tozý deńgeıin 27%-ǵa deıin tómendetý kútiledi.
Jylý jelilerin jóndeý jáne jańǵyrtý jobalarynyń iske asyrylý barysyn qaraý kezinde komıtet tóraǵasy jumystardy jandandyrý jáne josparlanǵan kólemderdiń ýaqytyly oryndalýyn qamtamasyz etý qajettigine nazar aýdardy. Jaýapty uıymdardyń basshylaryna jylytý maýsymy bastalǵanǵa deıin barlyq josparlanǵan is-sharalardy oryndaý jóninde tapsyrmalar berildi.
Komıtet tóraǵasy óńirdiń elektr jelilik kesheniniń jaı-kúıimen de tanysty. «Energosıstema» JShS teńgeriminde 14,3 myń shaqyrymnan astam elektr berý jelileri men 173 qosalqy stantsııa bar. 2026 jyly 304 shaqyrym elektr berý jelisine, 14 qosalqy stantsııaǵa jáne 65 taratý pýnkti men transformatorlyq qosalqy stantsııaǵa kúrdeli jóndeý júrgizý josparlanǵan.
Sondaı-aq ol KEGOC AQ-nyń 500 kV «Ólke» qosalqy stantsııasynda bolyp, Batys energetıkalyq torabyn Qazaqstan Respýblıkasynyń Biryńǵaı elektr energetıkalyq júıesimen biriktirý jobasynyń iske asyrylý barysymen tanysty. Nysandy jańǵyrtý aıaqtalǵannan keıin tranzıttik ótkizý qabileti 500 MVt-qa deıin artyp, Ulttyq elektr jelisiniń turaqtylyǵy men óńir tutynýshylaryn elektrmen jabdyqtaý senimdiligi kúsheıedi.
Nysandardy aralaý qorytyndysy boıynsha Erjan Ertaev óńirdiń energetıkalyq kásiporyndarynyń basshylarymen jáne jergilikti atqarýshy organdardyń ókilderimen keńes ótkizdi.
— Keńeste aldaǵy jylytý maýsymyna daıyndyq, magıstraldyq jylý jelilerin rekonstrýktsııalaý jobalaryn iske asyrý, jylý jáne elektr energetıkasy nysandaryndaǵy jóndeý naýqanynyń oryndalýy, sondaı-aq óńirdiń energetıkalyq ınfraqurylymyn damytý máseleleri qaraldy. Jumys saparynyń qorytyndysy boıynsha komıtet tóraǵasy jóndeý naýqanyn ýaqytyly aıaqtaý jáne energetıkalyq ınfraqurylymdy jańǵyrtý jobalaryn iske asyrý aldaǵy jylytý maýsymynan senimdi ótý úshin negizgi sharttar ekenin atap ótti, — delingen habarlamada.
Energetıkalyq kásiporyndardyń basshylaryna jóndeý jumystarynyń bekitilgen kestelerin múltiksiz oryndaýdy, jylý jáne elektr jelilerin jańǵyrtý jobalaryn ýaqytyly iske asyrýdy, sondaı-aq kúzgi-qysqy kezeńnen senimdi ótý úshin barlyq qajetti sharalardy qabyldaýdy tapsyrdy.
Budan buryn Aqtóbe oblysyna halyqaralyq ınvestıtsııalyq deńgeıdegi reıtıng berilgenin jazǵan edik.
