Aqtóbede 1600-ge jýyq bala múlde ekpe almaǵan
AQTÓBE. QazAqparat - Aqtóbe oblysynda 2538 balanyń ata-anasy ekpeden bas tartty. Al onyń 1534-i múlde ekpe jasatpaǵan. Balalardyń densaýlyǵyna alańdaǵan oblystyq densaýlyq saqtaý basqarmasy ár aýdandaǵy aýrýhanadan teolog mamanǵa shtat ashyp berdi. Din ókili tek ata-analardy kózqarasyn ózgertý jolynda jumys istemek, dep habarlaıdy «QazAqparat» tilshisi.
«Ata-analardyń ekpeden bas tartý jaǵdaılary 2005 jyldan bastap tirkeldi. Alǵashqy jyly 11 bala edi, 2016 jyly 2538 balaǵa jetti. Shynyn aıtqanda, sońǵy 5 jylda bas tartýshylar sany 10 ese ósip otyr. 2016 jyly 404 bala jańadan qosylǵan, olardyń 25 paıyzy - jas otbasynyń balalary. Qazirgi tańda Aqtóbe oblysy boıynsha 2538 bala tirkeýde tur. Onyń ishinde týa bitti birde-bir ekpe almaǵan balalar sany - 1534. ıAǵnı, juqpaly aýrýlarǵa sezimtal balalar sany ósip jatyr»,- deıdi oblystyq densaýlyq saqtaý basqarmasynyń basshysy Áset Qalıev.
Ekpeden bas tartqandardyń 74 paıyzdan astamy dinı kózqarasty jeleý etip otyr. Keıbiri asqynýdan qorqady, taǵy bireýleri túrli aqparat quraldaryndaǵy jaǵymsyz derekterdi alǵa tartty.
«Astanadan Aqtóbege kelgen 200 mamannyń arasynda teologtar boldy. Biz baılanysty ári qaraı jalǵastyryp, óz esebimizden shaqyrdyq. Jumys ekpe alýdan bas tartýshylar sany 309 balaǵa jetken Temir aýdanynan bastalady. Sonymen qatar, Muǵaljar, Alǵa, Shalqar, Baıǵanın, Hromtaý aýdandaryndaǵy aýrýhana men emhanalardan arnaıy shtat ashyldy. Bilikti maman alynyp, ol kún saıyn ekpeden bas tartqan ata-analarmen jumys isteıtin bolady»,- dedi Áset Qalıev.
Oblystyq densaýlyq saqtaý basqarmasy osy jumystan jaqsy nátıje shyǵatynyna úmitti.
Altynaı SAǴYNDYQOVA
