Aqtóbede 16 jastaǵy oqýshy anasyn óltirip, ájesin jaralady - psıholog túsinikteme berdi
AQTÓBE. KAZINFORM — Aqtóbede 16 jastaǵy oqýshy óz anasyn óltirip, ájesin pyshaqtaǵan. Oqıǵaǵa baılanysty qylmystyq is qozǵalyp, tergeý amaldary júrgizilip jatyr. Kámeletke tolmaǵan jasóspirim óz kinásin tolyq moıyndaǵan. Psıholog psıhosomatolog Aınur Qojabaeva mundaı qadamǵa balany ıtermeleıtin yqtımal psıhologııalyq faktorlardy túsindirdi.
Daýdyń basy telefonnan bastalǵany anyqtaldy.
Psıhologtyń aıtýynsha, jasóspirimderdiń agressıvti ımpýlsıvti áreketterine kóbine jasyryn jınalǵan agressııa, otbasyndaǵy qarym-qatynastyń buzylýy jáne telefonǵa táýeldilik sebep bolady.
- Bul ımpýlsıvti oqıǵa. Jınalǵan agressııa bir kúni jarylady. Kóbinese ata-analar balany erte jastan telefonǵa otyrǵyzyp qoıady. Bala óz álemine ketedi, emotsııasyn da, armany men maqsatyn da telefonnan izdeı bastaıdy. Eger otbasynda jylýlyq pen qarym-qatynas bolmasa, bala syrttan emotsııa izdeıdi, - deıdi maman Jibek Joly telearnasyndaǵy «Bugin LIVE» baǵdarlamasynda.
Onyń aıtýynsha, ata-analar eń aldymen balanyń telefonǵa táýeldi me, joq pa - sony baqylaýy kerek.
- Eger bala telefondy bergisi kelmeı aıqaı shyǵaryp, jylap, urys-keriske barsa - bul táýeldiliktiń alǵashqy belgisi. Ondaıda ata-ana, bala, ustaz jáne psıholog birigip jumys isteýi tıis. Tolyqtaı tyıym salý nátıje bermeıdi, kerisinshe qarsy reaktsııa týǵyzady. Balaǵa zııanyn túsindirý, bos ýaqytyn sportqa, úı sharýasyna baǵyttaý qajet. Ata-ananyń ózi de úlgi bolyp, úıde telefondy shektegeni durys, - deıdi psıholog.
Aıta keteıik, Aqtóbe oblystyq balalardyń quqyqtaryn qorǵaý basqarmasynyń basshysy Latyp Álibı kúdikti bala tolyq otbasynda tárbıelengenin jáne tergeý júrip jatqanyn jazǵan edik.