Aqtóbede 16 myń gektar egis alqabyn kıik taptap ketti
Aqtóbe oblysynyń egindi aýdany Áıteke bıde alqapqa kıik kirip ketken. Qazirgi kezde sharýalar bar shyǵynyn eseptep jatyr.
«Alqapta dán sebý jumysy aıaqtalǵan boıda kıik keldi, kóbeıip ketti. Áıteke bı aýdanynyń Qumqudyq aýylyna Jangeldın, Aqtasty aýyldary jaǵynan keldi dep aıtsam bolady. Ony qýyp, keri qaıtarǵandaı boldyq. Kezekshilik te qoıdyq. Eki brıgada jumys istedi. Kólikpen júrip, kúzettik. Degenmen kıik egin alqabyna kirip ketti. Sol jerde jatty, taptap, qazyp tastady jerdi. Qazir egin jınaý jumystary júrip jatyr. Arpa egilgen bir alqaptyń ár gektarynan 13 tsentner ónim jınadyq. Al kıik kirgen alqapta gektarynan 8 tsentner ónim aldyq. ıAǵnı, kıik kirgen soń gektarynan 4 tsentner joǵaltyp turmyz. Bul naqty derek. Sonda bir tórtburysh ishinen, ıaǵnı, alqaptan shamamen 200 tonna joǵalttyq. Ár tonnasy 60 myń desek, biz 12 mln teńgeden aıyrylyp otyrmyz. Sonymen birge kıik júrgen jerdegi alqaptyń gektarynan 4 tsentner bıdaı jınaldy. Taptalmaǵan jerinde gektarynan 8-9 tsentner aldyq. Bárin qýyp júrý múmkin emes. Bizdiń brıgada 12-13 shaqyrym jerge deıin qýdy, olar áp-sátte qaıtyp keledi. Ony atýǵa, urýǵa bolmaıdy. Sharýalar kıikten ózge shegirtkemen de kúres júrgizdi. Qazir de qıyn. 25-tamyzdan beri jańbyr jaýyp tur. Bul da kedergi keltirip tur orý jumystaryna. Biz komıssııa kelip, shyǵyndy qaraýyn suraımyz»,- dedi «Qumqudyq» JShS dırektory Aleksandr Chemodanov.
Jalpy Aqtóbe oblysynyń Áıteke bı, Qobda aýdandarynda aýyl sharýashylyǵy maqsatyndaǵy jerlerdi kıik taptady.
«Áıteke bı aýdanynyń Qumqudyq, Sarat, Sulýkól, Aqtasty aýyldyq okrýgteri men Qobda aýdanyń Ótek aýylynda tirkeldi. Barlyǵy 16 myń gektarǵa jýyq jer. Sharýalar úshin egis alqabyn saqtaý qıyndyq týǵyzdy. Olar qarjylyq jaǵdaıyna áser etetinin habarlady. Mınıstrlikke habar berildi»,- dedi Aqtóbe oblystyq Aýyl sharýashylyǵy jáne jer qatynastary basqarmasynyń bólim basshysy Nurbek Raıymbaev.
Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaev taratqan aqparatqa súıensek, oblysta Betpaqdala jáne Ústirt popýlıatsııasy bar. Betpaqdala popýlıatsııasynda 100 myń, Ústirtte 30 myń bas kıik tirkeldi. Al Qobda aýdany men Reseımen shekaralas aýmaqtaǵy Oral kıik popýlıatsııasynda 4 myń bas kıik kezdesedi. Inspektorlar kıik mekendeıtin aýdandarda janýardyń mıgratsııasy týraly aqparat bergen.
