Aqtóbede 16 mektep dırektory men 19 balabaqsha meńgerýshisiniń orny bos tur
Aqtóbe oblysynyń Bilim salasynda sapany qamtamasyz etý departamenti byltyr 123 bilim berý uıymyna tekserý júrgizdi. Mektepterde oqý josparlarynyń úlgilik oqý josparyna sáıkes kelmeýi, shaǵyn ortalyqtar men mektepaldy daıarlyq synyptaryna arnalǵan pándik damytý ortanyń qalyptastyrylmaýy, toptardy jasaqtaǵanda jas erekshelikteriniń eskerilmeýi anyqtaldy.
«Balabaqsha men mektepterde 99 maman jetispeıdi. Basym kópshiligi Hromtaý, Temir, Oıyl aýdandarynda. Bos oryndardyń 17-de beıini sáıkes kelmeıtin adamdar jumys istep júr. Sonymen qatar 16 mektep dırektorynyń, 19 balabaqsha meńgerýshileriniń orny bos tur.
Al Áıteke bı aýdanynda 2017-2018 oqý jyldarynan beri birneshe balabaqsha meńgerýshisiniń orny bos», - dedi Aqtóbe oblystyq Bilim salasynda sapany qamtamasyz etý departamentiniń basshysy Bulbul Kúzembaeva.
Pedagogıkalyq ádep jáne onyń quqyqtaryn qorǵaý máseleleri boıynsha oblys pedagogterinen 126 ótinish pen shaǵym, suraq túsken. Qaralǵan ótinishterdiń qorytyndysy boıynsha bilim berý uıymynyń basshylary men pedagogterine ádep normalaryn buzǵany úshin 3 eskertý, 2 sógis, 3 ákimshilik shara qoldanyldy. Sonymen qatar Hlebodar OM (gazet-jýrnalǵa jazylýǵa mindetteý), Blagodar OM (túngi reıdterge mindetteý) shaǵymdary boıynsha ákimshilik hattama toltyryldy.
Bıyl 166 bilim berý uıymyna memlekettik attestatsııa júrgizý josparlanǵan. Memlekettik attestatsııa bastalǵaly 33 mekteptiń 4, 9, 11-inshi synyptardyń 2381 oqýshysynan test synamalary alynyp, bilim sapasy 21,6 % qurady.
«Bilim berý uıymdaryndaǵy qaýipsizdik máselesi Memleket basshysynyń erekshe baqylaýynda ekeni málim. Bilim berý uıymdarynyń barlyǵynda beınekameralar ornatylǵan. Alaıda, tolyq jınaqtalǵan mektepterdiń 24,6%, shaǵyn jınaqtalǵan mektepterdiń 36,9% beınebaqylaý júıesi talaptarǵa sáıkes kelmeıdi (Aqtóbe qalasy, Alǵa, Áıteke bı, Qarǵaly, Qobda, Oıyl, Temir aýdandarynda). Byltyr qarasha, jeltoqsan aıynda júrgizilgen monıtorıng qorytyndysy boıynsha 25 memlekettik kolledjdiń bireýi ǵana arnaıy kúzetpen qamtylǵany belgili boldy. Olar kúzet mekemesimen kelisimshart jasaǵan («Aqtóbe avtojol kolledji» MKQK), 10 kolledjde týrnıket ornatylǵan. Al 24 kolledjdiń beınebaqylaý júıeleri talaptarǵa sáıkes kelmeıdi», - dedi Bulbul Kúzembaeva.
Aıta keteıik, Aqtóbe qalasyndaǵy Qyzyljar orta mektebiniń jáne Baıǵanın tehnıkalyq kolledji jataqhanasynyń ǵımaraty apatty jaǵdaıda ekeni anyqtalyp otyr.
