Aqtóbede 153 jylytý beketi daıyndaldy
AQTÓBE. QazAqparat – Aqtóbede tótenshe jaǵdaılar qyzmeti qysta jolda abaı bolýǵa shaqyrdy. Qazir 153 jylytý beketi men 14 myń tonna ınertti materıal daıyn, dep habarlaıdy QazAqparat tilshisi.
Aqtóbe oblysynda qar basý qaýpi basym 154 ýchaske bar. Tasjoldyń bári qazir baqylaýǵa alynǵan. Al 153 jylytý beketiniń 15-i respýblıkalyq jol boıynda ornalasqan. Syıymdylyǵy 10 myń adamǵa shaqtalǵan.
«Kóktaıǵaq, qar aralas jańbyrdan Samara – Shymkent tasjoly 15 ret jabylyp, qaıta ashyldy. Jolaýshylar dalada qalmas úshin jergilikti polıtsııa qyzmeti kómek kórsetip, kúni-túni qamqorlyq jasady. Aqtóbe men Orynbor arasyndaǵy memorandýmǵa sáıkes kórshi elde jol ýaqytsha jabylsa, dereý habarlap birdeı shara qoldanamyz. Qazir tehnıkany tolyqtyryp, qys boıy ýaqtyly joldy qardan tazartýǵa kúsh salamyz», - dedi «QazAvtoJol» AQ AOF dırektory Marat Mahambetov.
Qarasha aıynan beri jolda 75 adam qutqarylyp, 200-den astam jolaýshy evakýatsııalandy. Sonymen qatar 12 adam aýrýhanaǵa jetkizildi.
Aıta keteıik, jylytý maýsymy bastalǵan kezde Aqtóbede qaıǵyly oqıǵa da jıiledi.
«Jylý berý maýsymy bastalǵannan beri 4 adam qaza bolyp, ekeýi jaralandy. Qurshasaı aýylynda úıde órt shyǵyp, azamattyq nekedegi 55 jáne 57 jastaǵy erli-zaıypty oqıǵa ornynda, kúıik shalǵan taǵy bireýi aýrýhanada kóz jumdy. Aldyn ala boljam boıynsha temeki sóndirilmeı, arty órtke ulasqan. Turǵyn úıler órt qaýipsizdigin saqtap, abaı bolǵan jón», - dedi oblystyq TJD bastyǵynyń mindetin atqarýshy Asqar Tóleshov.
