Aqtóbede 1500 dombyrashy bir mezgilde birge «Kóńilashar» kúıin tartty
AQTÓBE. KAZINFORM — Ulttyq dombyra kúnine oraı búgin «Qazaq halqyna myń alǵys» stellasy alańynda «Babamnan qalǵan amanat — asyl dombyra» atty mádenı-kópshilik shara ótti.
Maqsat — ulttyq ónerdiń altyn arqaýy sanalatyn dombyrany ulyqtaý, qazaqtyń dástúrli kúı óneri men halyq ánderin keńinen nasıhattaý arttyrý.
Merekelik kontserttiń shymyldyǵy aqyn Qadyr Myrza Áliniń «Naǵyz qazaq — Dombyra» óleńimen ashylyp, birikken orkestrdiń oryndaýyndaǵy Túrkeshtiń «Kóńilashar» kúıimen jalǵasty.
Kontsert barysynda qazaqtyń ulttyq kúı óneri men dástúrli mýzykasynyń úzdik týyndylary oryndaldy.
Qazaqstannyń Halyq ártisi Aıgúl Úlkenbaeva óner kórsetti. 1500 dombyrashy ulttyq kúı óneriniń jaýharlary — Qurmanǵazy Saǵyrbaıulynyń «Balbyraýyn» jáne «Adaı», Ábdimomyn Jeldibaevtyń «Erke sylqym» kúılerin bir mezgilde birge oryndady.
Sonymen qatar, Aqtóbede «Dombyra jáne dáýir» kórmesi ashylyp, belgili tulǵalarǵa tıesili biregeı dombyralar tanystyryldy.
Ekspozıtsııada belgili kúıshiler Baltursyn Sarybaeva, Aısa Sháripov, Baqyt Basyǵaraev, Momyn Baıǵanın, Qazaqstan Respýblıkasynyń halyq ártisi, ánshi ári kompozıtor Dımash Qudaıbergen, aqyn Bákir Tájibaev, general-leıtenant Jansen Kereev, mádenıet qaıratkeri Erkin Qurmanbek jáne basqa da tanymal tulǵalarǵa tıesili dombyralar qoıylǵan.
Kórmeniń jeke bólimi belgili qazaqstandyq sheberler Súndet Nurymov, Qaramuqan Basshın, Qutym Qasenov, Erkósaı Ábilov, Jetes Jamekov jáne jas sheber Murathan Tanataruly jasaǵan ulttyq mýzykalyq aspaptarǵa arnaldy.
Aıta keteıik, ulttyq dombyra kúnine oraı Qazaqstanda 2000-nan astam mádenı is-shara ótedi.
