Aqtóbede 150-ge jýyq qańǵybas adam arnaıy ortalyqqa jetkizildi
AQTÓBE. QazAqparat - Polıtsııa qyzmetkerleri kóshe kezip júrgen 146 adamdy qabyldaý-taratý ornyna jetkizdi, dep habarlaıdy QazAqparat tilshisi.
Kóshe kezbeleri qysta dalada qalyp, aıaq-qolyn úsirip alady. Keıbiri jylý qubyryna denesin kúıdiredi. Qaterdiń aldyn alý maqsatynda polıtsııa «Qysqy karta» aktsııasyn ótkizip, kóshe kezbelerin qabyldaý-taratý ornyna, ıaǵnı, Turǵylyqty jeri joq jáne qylmystyq jazasyn ótegen adamdardy áleýmettik beıimdeý ortalyǵyna jetkizdi. Osy aptada qabyldaý-taratý ornyna 146 adam jetkizildi. Olardyń tek beseýi ǵana ortalyqqa ornalastyryldy. Al qalǵan 141-niń jeke basy men turǵylyqty jeri anyqtalyp, úılerine jiberildi.
«Kópshiligi birneshe ret atalǵan mekemege jetkizilip, qujaty jasalǵan. Alaıda olar qaıta kóshe kezip ketedi. Polıtsııa qyzmetkerleri bul baǵyttaǵy jumysty jalǵastyrýda. Qazirgi ýaqytta kóshede, aýlada, jertólede nemese basqa jerlerde úısiz adamdardy baıqasańyz, 21-75-47, 90-73-54 qabyldaý-taratý kezekshi bólimine nemese polıtsııaǵa qońyraý shalyńyz», - dedi oblystyq PD baspasóz qyzmetiniń jetekshisi Erbolat Sarqulov.
