Aqtóbede 15 myńǵa jýyq otbasy járdemaqy aldy
AQTÓBE. QazAqparat – Aqtóbede ataýly áleýmettik kómek alý joldary túsindirilip jatyr. Oblys boıynsha tek 108 ótinish maquldandy, dep habarlaıdy QazAqparat tilshisi.
Aqtóbe qalasy boıynsha ataýly áleýmettik kómek alý joldaryn túsindiretin 4 oryn bekitildi. Olar: Halyqtyq keńse, qalalyq jumyspen qamtý ortalyǵy men Almaty jáne Astana aýdanynyń ákimdigi.
«Ataýly áleýmettik kómek kórsetýdiń ózgertilgen mehanızmi ataýly áleýmettik kómekti taǵaıyndaýdyń ashyqtyǵyn qamtamasyz etedi. Kómekti shyn muqtaj jandar alatyn bolady. Olarǵa jumysqa ornalastyrylady nemese óz isin ashýǵa qoldaý kórsetiledi»,- dedi oblys ákiminiń orynbasary Marat Toqjanov.
Aqtóbe oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Bulbul Eleýsinovanyń aıtýynsha, usynylǵan jumystan bas tartqan jaǵdaıda alty aı ataýly áleýmettik kómek ala almaıdy. Bıyl 1 500 aqtóbelikti jumyspen qamtý josparlanyp otyr.
«14789 otbasy qańtar aıynda memlekettik járdemaqylaryn aldy. Sonyń ishinde tórt balasy bar 11324, bes balasy bar 2708 , alty balasy bar 597, jeti jáne odan da kóp balasy bar 160 otbasy. 6330 otbasyǵa arnalǵan ataýly áleýmettik kómekke bıyl 3,5 mlrd teńgeden astam qarjy qarastyrylǵan. Jumyspen qamtý ortalyǵynda qujattar qabyldanyp jatyr. Óńirde 161 ýchaskelik komıssııa jumys isteıdi»,- dedi basqarma basshysy B.Eleýsinova.
Aıta keteıik, 1-6 jas aralyǵyndaǵy balalarǵa kepildendirilgen áleýmettik paket qarastyrylǵan.
«Áleýmettik kómektiń tórt túri bar. Olar: mektep formasy, ystyq tamaq, oqý quraldary men tasymaldaý. Qazirgi kezde balalarǵa 2,4 mıllıard teńge bólinip otyr. Mektepterde bala sany anyqtaldy. Esep boıynsha oblysta 20 559 oqýshy kómek alady», - dedi oblystyq bilim basqarmasynyń basshysy Lázzat Orazbaeva.