Aqtóbede 15 memlekettik qyzmetshi sybaılas jemqorlyq boıynsha jaýapqa tartyldy
AQTÓBE. QazAqparat - Ótken jyly Aqtóbede 59 memlekettik qyzmetshi jaýapqa tartyldy. Bıyl 15 adam zań aldynda jaýap berip jatyr, dep habarlaıdy QazAqparat tilshisi.
Sybaılas jemqorlyqqa qarsy is-qımyl ulttyq bıýrosynyń oblystyq departament basshysy Mırlan Muhambetov búgin «Adaldyq alańy» jobalyq keńsesine baryp, turǵyndardyń suraǵyna tikeleı efır arqyly jaýap berdi. Óńirde sybaılas jemqorlyq deregi kóbine quqyq qorǵaý salasynda tirkeledi.
«Elimiz boıynsha Aqtóbede quqyq qorǵaý qyzmetkeriniń sany kóp. Óńirde 4 myńǵa jýyq qyzmetker bar. Sybaılas jemqorlyǵy osy salada jáne jergilikti ákimdik, bilim, densaýlyq saqtaý salasy bar. Bıyl da polıtsııa qyzmetkerlerine qatysty qylmystyq is qaralyp jatyr», - dedi Sybaılas jemqorlyqqa qarsy is-qımyl ulttyq bıýrosynyń oblystyq departament basshysy Mırlan Muhambetov.
Tikeleı efır kezinde memlekettik qyzmetshilerdiń túrmelerge ekskýrsııa jasap, sybaılas jemqorlyqtyń aldyn alý sharasy da suraldy.
«Birneshe ekskýrsııa boldy. Sol ekskýrsııadan keıin memlekettik qyzmetkerler ózderine oı túıgenin aıtty. Bul shara sybaılas jemqorlyqtyń aldyn alýǵa múmkindik berse, jalǵastyramyz», - dedi Mırlan Muhambetov.
Aıta keteıik, Ulttyq bıýronyń oblystyq departamenti 2019 jyldyń 3 aıynda 53 qylmystyq isti tirkedi. Onyń 45-i jemqorlyqqa qatysty. Jemqorlyqqa qatysty istiń 9-y bıýdjet qarjysyn jymqyrý, jeteýi para jáne 31-i qyzmetin asyra paıdalaný. Іsti bolǵandardyń arasynda memlekettik qyzmetshiler bar. Onyń ekeýi oblystyq, aýdandyq deńgeıdegi basshy, tórteýi quqyq qorǵaý salasynan.
Barlyǵy 43 qylmystyq is sotqa jiberildi. Іsti bolǵan basshylar arasynda Aqtóbe qalalyq turǵyn úı qatynastary bóliminiń basshysy Janargúl Dúısekenova da bar. Qazir tergeý júrip jatyr.
