Aqtóbede 14 jastaǵy ananyń ómirine jaýaptylar jumystan shyǵaryldy

AQTÓBE. KAZINFORM - Oıyl aýdandyq bilim bóliminiń basshysy da qyzmetinen ketti. Al oqýshy qyz úıine oralmaı, basqa jerge aýystyryldy.

Aqtóbede 14 jastaǵy jasóspirim bosanyp, salaǵa jaýaptylardyń bári jumystan shyǵaryldy.

- Osy oqıǵadan soń nelikten degen suraqqa biz jaýap izdedik. Tergeýdi ózimiz de júrgizdik. Birneshe qyzmetker jumystan bosatyldy. Aýdandyq bilim bóliminiń basshysynan bastap osyǵan qatysy bar barlyq qyzmetkerge shara qoldandyq. Qyzmetkerlerdi jumystan shyǵarýmen shektelmeımiz. Júıeli túrde qadaǵalaý bolý kerek. «Jan ahýal» ortalyǵy bar, qarjy bólindi. Ondaǵy mamandardyń da jan-jaqty kómek kórsetýge múmkindik bar. Balanyń bolashaǵy mańyzdy. Ata-anasymen de sheshim qabyldandy. Qazir oqýshy qyz basqa jerge aýystyryldy, - dedi Aqtóbe oblysynyń ákimi Ashat Shaharov ortalyq kommýnıkatsııalar qyzmetinde.

Eske salsaq, Aqtóbe oblysy Oıyl aýdanynda 9-synyp oqýshysy ana atandy. Onyń júkti ekenin eshkim bilmegen. Tipti úsh ret medıtsınalyq tekserýden ótse de, anyqtalmady.

Polıtsııa kúdiktini ustap, qamady. Ol 60-tan asqan er adam jáne ógeı atasy bolyp shyqty.

Buǵan deıin eger bilim, densaýlyq saqtaý salasyndaǵy mamandardyń qandaı da bir kinási anyqtalsa, jumystan shyǵarylatyny týraly aıtyldy.