Aqtóbede 14 jastaǵy ananyń ómirine jaýaptylar anyqtalady

AQTÓBE. KAZINFORM - Eger bilim, densaýlyq saqtaý salasyndaǵy mamandardyń qandaı da bir kinási anyqtalsa, jumystan shyǵarylady. Arnaıy komıssııa óz qorytyndysyn shyǵarýy tıis.

Aqtóbe oblysynyń ákimi Ashat Shaharov 14 jastaǵy ananyń taǵdyryna kim jaýapty ekenin anyqtaýdy tapsyrdy.

- Sońǵy aptada eldi dúr silkindirgen jaǵdaılar boldy. Qyz bala júkti boldy. Jaýapsyzdyq, nemquraılylyqty kórsetedi. Kim jaýap beredi? Dárigerler me, sol synyptaǵy muǵalimder me? Kim óz mindetin atqarmaǵan? Basshylar ma, aýdan ákimdigi me? Oblystyq Densaýlyq saqtaý basqarmasy tekserý júrgizýi tıis. Shuǵyl túrde sheshim qabyldap otyrmyz. Balanyń bolashaǵy ne bolady? Tekserip, jaýaptylardy anyqtaý, kinási bolsa, qyzmetten bosatý kerek, - dep tapsyrdy Aqtóbe oblysynyń ákimi Ashat Shaharov.

Oblys ákiminiń baspasóz qyzmetiniń habarlaýynsha, balalardyń qaýipsizdigin qamtamasyz etý baǵytyndaǵy aldyn alý sharalaryn kúsheıtý, tıisti mekemelerdiń jaýarkershiligin arttyrý tapsyryldy.

Eske salsaq, Aqtóbe oblysy Oıyl aýdanynda 9-synyp oqýshysy ana atandy. Onyń júkti ekenin eshkim bilmegen. Tipti úsh ret medıtsınalyq tekserýden ótse de, anyqtalmady.

Polıtsııa kúdiktini ustap, qamady. Ol 60-tan asqan er adam jáne ógeı atasy bolyp shyqty.

Oqý-aǵartý mınıstrligi Balalardyń quqyqtaryn qorǵaý komıteti Aqtóbe oblysyndaǵy jaǵdaıdan soń pikir bildirdi.