Aqtóbede 14-22 naýryz aralyǵynda 1000-ǵa jýyq is-shara uıymdastyrylady
AQTÓBE. KAZINFORM – Naýryz merekesi Aqtóbede 14-naýryz kúni bastalady. Kórisý kúninen bastap Ulystyń uly kúnine deıin taqyryptyq sharalar ótkiziledi.
Aqtóbe oblysynda 14-naýryzda Kórisý kúni ótedi. Bul kúni barlyq mekeme qyzmetkeri ulttyq kıim kıip, Naýryz merekesin toılaýdy bastaıdy. Qalalyq mádenıet úıi, Sazdy mádenıet úıi, Oblystyq halyq shyǵarmashylyǵy ortalyǵy, Oblystyq tarıhı-ólketaný mýzeıi, «Alaqaı» qýyrshaq teatry alańynda kıiz úıler tigilip, halyqqa ystyq baýyrsaq, aıran, qymyz, shubat satylymǵa shyǵarylady.
Al, 15-naýryz – Shańyraq kúni. Analar keńesi kezdesý ótkizip, kelinder baıqaýy uıymdastyrylady. 16-naýryz – Shejire kúninde «Er Edige» jyr mektebiniń kontserti uıymdastyrylady. 17-naýryzdaǵy Ulttyq sport kúni qaladaǵy sport mektepteriniń alańynda ulttyq sport túrlerinen, ıaǵnı, jappaı kókpar, aýdaryspaq, arqan tartý, asyq atý, sadaq atý, jamby atý, kúres, gir kóter, báıge, teńge ilý, toǵyzqumalaq syndy oıyn túrlerinen jarys ótkiziledi.
- 18-naýryz Bulaqtyń kózin ashý kúni dep belgilendi. Aqtóbe qalasy mańyndaǵy jáne aýdandardaǵy bulaq kózin ashý josparlanyp otyr. Al 19-naýryzdy Shattyq kúni dep atap, bilim berý uıymdarynda jastar keshin ótkizemiz. «Naýryz kádesi», «Naýryz qorjyn» syılyqtaryn tartý etip, ázil-syqaq oıyndaryn uıymdastyramyz. 20-naýryz – Yntymaq kúni. Qoǵamdyq kelisim men qazaqstandyq rýhanı birlikti nyǵaıtý jáne otansúıgishtik sezimge tárbıeleý maqsatynda ózge ult ókilderiniń qatysýymen is-sharalar ótkiziledi. 21 naýryz – Tartý kúni. Qala turǵyndaryna, ásirese, dalada qyzmet etetin jumysshylarǵa ystyq baýyrsaq, Naýryz kóje tartylady. 22-naýryzda negizgi is-shara «Qazaq halqyna myń alǵys» alańynda ótedi. Onda «Naýryznama» teatrlandyrylǵan kontserttik baǵdarlamasy, sheberler men qolónershilerdiń jármeńkesi, ulttyq sport túrlerinen alýan túrli jarystar ótedi. Sonymen birge «Aýyl amanaty» jobasy aıasynda nesıe alyp, kásip bastaǵan aqtóbelikter óz ónimin usynady, - dedi Aqtóbe oblystyq mádenıet, arhıvter jáne qujattama basqarmasynyń basshysy Altynaı ıÝnısova.
Aıta keteıik, Prezıdent saıabaǵynda 5 kıiz úı tigiledi. Bireýinde kórme jasaqtalyp, qalǵan 4 kıiz úıde qala turǵyndary men qonaqtarǵa arnalǵan saýda oryndary bolady. Jalpy Aqtóbe qalasynda 20-dan astam orynda Naýryz merekesine oraı kontserttik shara uıymdastyrylady.
