Aqtóbede 13 jastaǵy balany KamAZ qaǵyp ketti

AQTÓBE. KAZINFORM — Oqıǵa Muǵaljardyń Qandyaǵash qalasynda boldy. Bala velosıped minip júrgen. 

Aqtóbe oblystyq PD baspasóz qyzmetiniń habarlaýynsha, jol-kólik oqıǵasynan soń qylmystyq is qozǵalyp, tergeý bastaldy.

— Aldyn ala málimet boıynsha, KamAZ avtokóliginiń júrgizýshisi artqa shegingende velosıped aıdap júrgen jasóspirimdi soqqan. Jasóspirim alǵan jaraqattarynan oqıǵa ornynda kóz jumdy. Qazirgi ýaqytta qajetti saraptamalar taǵaıyndalyp, oqıǵanyń barlyq mán-jaıy anyqtalyp jatyr, — dep habarlady oblystyq PD baspasóz qyzmeti.

Oqıǵa búgin túste Qandyaǵash qalasyndaǵy S. Seıfýllın kóshesinde boldy. Ol jerde ortalyq saıabaq bar.

Aıta keteıik, bul jer 5 jyl boıy qurylysy júrgen saıabaq. Qurylysyna 234 mln teńge jumsalǵan saıabaq qazir jaramsyz kúıge tústi. Shamdar iske qosylmaǵan, máńgilik alaý oty jaǵylmady, al salynǵan arkalardyń tirekteri qıraı bastady. Ákimdik merdigerdi jóndeý jumysyn júrgizýge mindettedi.