Aqtóbede 13 jasar balaǵa zorlyq kórsetý deregi boıynsha is qozǵaldy

AQTÓBE. KAZINFORM — Aqtóbede 13 jastaǵy balaǵa zorlyq jasalǵan. Aqtóbe polıtsııasy osy is boıynsha tergeý bastady. 

Bul jaıynda NeMolchıKZ qoǵamdyq qory áleýmettik jelide aqparat taratty. 

Oǵan súıensek, 13 jasar aqtóbeliktiń ákesi zorlyq jasaǵan er adamdy taýyp, polıtsııaǵa habar bergen. Aqtóbe qalalyq polıtsııa basqarmasy 1 tamyz kúni isti tirkep, tergeý júrgizgen.

Qor osy is boıynsha kúdikke ilikken er adam tergeý ızolıatorynda emes, úıqamaqta ekenin jazyp, dabyl qaqty. 

— 8 tamyzda sot-medıtsına saraptamasynyń qorytyndysy shyqqan. Onda balanyń denesiniń zaqymdanǵany anyqtalǵan. Seksýaldy zorlyq týraly búge-shúgesine deıin aıta almaımyz. Bul bir ǵana jaǵdaı emes. Taǵy bir kúdikti anyqtaldy. Otbasyly er adamnyń balalary bar, sonymen birge zardap shekken balamen qurdas bireýi. Ony ustamaǵan. Ákesiniń aıtýynsha, kúdiktiniń kásibi bar, — dep jazylǵan qoǵamdyq qordyń áleýmettik jelidegi paraqshasynda.  

Aqtóbe oblystyq PD qylmystyq is qozǵalyp, tergeý júrip jatqanyn rastady. 

— Qazirgi kezde osy oqıǵa boıynsha ic qozǵaldy, tergeý júrip jatyr. Kámelet jasyna tolmaǵan balaǵa qatysty is bolǵan soń ózge aqparatty bere almaımyz, — dedi Aqtóbe oblystyq PD baspasóz qyzmetiniń jetekshisi Erbolat Sarqulov. 

Aıta keteıik, Aqtóbe oblysynda dáriger ólimine qatysty is jabyq ótedi.

Qylmystyq is 4 bap boıynsha qarala bastady.