Aqtóbede 129 myń gektarǵa jýyq jer memleket menshigine qaıtaryldy

AQTÓBE. KAZINFORM – Sharýalar men fermerlerge aldyn ala eskertý berip, túsindirý jumysy júrgiziledi. Eger maqsatty ıgermese, memleket qaıtaryp alady. 

Aqtóbe oblysynda bıyl aýyl sharýashylyǵy maqsatyndaǵy jerdi sharýalarǵa berý úshin 14 konkýrs ótti. Onyń nátıjesi boıynsha 242 600 gektar jer aınalymǵa engizildi. Onyń 2 900 gektary – egistik. Sonymen birge jerdi memleketke qaıtarý jospary da oryndalyp jatyr. 

– 2022 jyly 500 myń gektar jerdi qaıtarý mindeti qoıyldy. Sol jyly 535 myń gektar jer qaıtaryldy. 2023 jyly 366 myń, 2024 jyly 219 myń gektar qaıtaryldy. Al bıyl 160 myń gektardy qaıtarý kerek dep tapsyrma qoıyldy. Búginde 128 900 gektar jer memlekettiń bosalqy jer qoryna berildi, - dedi Aqtóbe oblystyq jer qatynastary basqarmasynyń basshysy Nurbol Erjanov. 

Bıyl oblystyq jer resýrstaryn basqarý departamenti jer telimderine qatysty 260 materıaldy qarady. Aýdan ákimdikteriniń qujattary negizinde túsindirme jumysy júrgizilip, eskertý beriledi. Eger sharýalar alǵan jerdi qajetine jaratpasa, memlketke qaıtarýy tıis. 

– Aqtóbede 6 jer ýchaskesin maqsatyna saı paıdalanbaǵan. Onyń jalpy aýdany 10 myń gektar bolady. Qazir isti sot qarap jatyr, - dedi Nurbol Erjanov.

Aıta keteıik, Aqtóbe oblysynyń aýmaǵy 30,1 mln gektardy quraıdy. Onyń 26,9 mln gektary aýyl sharýashylyǵy alqaby. 25,3 mln gektary jaıylym bolsa, 707 myń gektary egistik, 494 myń gektardan astamy tyńaıǵan jer. 

Buǵan deıin habarlaǵanymyzdaı, Almatyda jańa mekteptiń joly úshin 11 jer telimi májbúrli túrde memleket qajettiligine alyndy.