Aqtóbede 1200 jas ásker qataryna shaqyrylady

AQTÓBE. KAZINFORM — Qyrkúıek-jeltoqsan aılary aralyǵynda shaqyrylatyn aqtóbelikter elimizdegi birneshe áskerı bólimge jiberiledi. 

Aqtóbelikter Qarýly kúshter qataryna, Ulttyq ulanǵa, UQK shekara qyzmetine, TJM jáne de memlekettik kúzet qyzmetine alynady.

— 18-27 jas aralyǵyndaǵy densaýlyǵy jaramdy jastar shaqyrylady. Áskerde qyzmet etý jastardyń tulǵa retinde qalyptasýyna múmkindik beredi. Bıyl sms habarlamalar jiberiledi. Qaǵaz nusqadaǵy qujat ta mekenjaıyna nemese jumys ornyna joldanady. Sonymen birge joldamany jergilikti áskerı basqarý organdarynan ala alady. Bıyl Aqtóbeden 1200 jas ásker qataryna alynady, — dedi Aqtóbe oblystyq qorǵanys isteri departamentiniń basshysy Ádilet Otarbaev.

Aıta keteıik, kóktemde Aqtóbede 1100-den astam jas ásker qataryna qabyldandy. Bıyl Aqtóbe oblysy boıynsha 84 sarbaz bilim grantyn ıelendi.

Eske salsaq, kúzde elimizde shamamen 22 myń jas qazaqstandyq Qarýly kúshter men basqa da áskerı qurylymdardyń qataryna qosylady. Astananyń ózinen bıylǵy kúzgi shaqyrtý naýqany aıasynda 1000-nan astam jas ásker qataryna jiberiledi. Bıyl áskerge shaqyrý rásimi halyq úshin barynsha ashyq ári yńǵaıly formatta uıymdastyrylǵan.