Aqtóbede 12 jasar qyzdy emdeýge jınalǵan qarjy bank shotynan joǵalyp ketti
AQTÓBE. QazAqparat - Aqtóbede 12 jastaǵy qyzdyń emine jınalǵan qarjy bank esepshotynan iz-túzsiz joǵalyp ketti. Qazirgi ýaqytta polıtsııa Qylmystyq kodekstiń «Alaıaqtyq» baby boıynsha is qozǵady, dep habarlaıdy QazAqparat tilshisi.
Aqtóbe qalasynyń eriktileri 2019 jyldyń naýryz aıyna josparlanǵan ota úshin qarjy jınaýǵa kómektesken bolatyn. Týabitti sal aýrýyna shaldyqqan Marııa Maksakovaǵa ota jasaý úshin Sankt-Peterbýrgke jol júrý josparlanǵan bolatyn. Alaıda Kaspı bank esepshotynan 790 myń teńge joǵalyp ketken.
«Áleýmettik jeli arqyly Marııa Maksakovanyń emine aqsha jınaldy. Biraq Kaspı bankte turǵan qarjy pın-kodsyz basqa adamǵa aýdarylyp ketti. Buǵan deıin de kómek úshin ózge adamdarǵa aqsha jınaldy, ata-analar bilmestikpen bógde adamǵa pın-kod berip qoıǵan edi. Munda eshkimge eshqandaı aqparat berilmegen. Kimniń alǵanyn bilmeımiz. Kaspı bankten jaǵdaıdy túsindirýdi surap otyrmyz. Biraq resmı hat jazbadyq», - deıdi volonter Ekaterına Golotına.
Qazir osy oqıǵaǵa baılanysty qylmystyq is qozǵalyp, tergeý júrip jatyr.
«Polıtsııa beıtanys adamǵa karta nómirin aıtýǵa bolmaıtynyn eskertedi. Barlyq aqparat tutynýshynyń qaýipsizdigi úshin qupııa saqtalýy kerek. 7 naýryz kúni belgisiz bireýler kómek kórsetemin dep aldap, karta nómirin jáne qupııa CVV-kodyn bilip alǵan. Karta Kaspı bankke tıesili. Esepshottan 790 myń teńge alynǵan. Bul qarjy balanyń emine jınalǵan eken. Qazirgi ýaqytta «Alaıaqtyq» babymen tergeý júrip jatyr», - dep habarlady oblystyq polıtsııa departamentiniń baspasóz qyzmeti.
Aıta keteıik, Marııa Maksakovanyń anasy qandaı da bir aqparat berýden bas tartty.
