Aqtóbede 11-synyp oqýshysy óz-ózine qol jumsady

Aqtóbe qalasyndaǵy №8 orta mekteptiń 11-synyp oqýshysy óz-ózine qol jumsady. Ol kórshisiniń saraıynda asylyp qalǵan, dep habarlaıdy QazAqparat tilshisi.

Aqtóbedegi eriktiler balanyń joǵalǵany týraly habarlama taratyp, izdeý júrip jatqanyn málimdegen edi. Derekterge súıensek, 16 jastaǵy bozbala 12 qyrkúıek kúni shamamen saǵat 19:00-de shyǵyp ketken. Ústine shorty men fýtbolka kıgen.

Aqtóbe oblystyq Polıtsııa departamenti baspasóz qyzmetiniń habarlaýynsha, bozbala 13 qyrkúıek kúni kórshisiniń saraıynan tabyldy.

Polıtsııa bólimine kórshileriniń saraıynan 2007 jyly týǵan kámeletke tolmaǵan balanyń máıiti tabylǵany týraly habarlama kelip tústi. Osy fakti boıynsha Qylmystyq kodekstiń «Ózine-ózi qol jumsaýǵa deıin jetkizý» baby boıynsha sotqa deıingi tergep-tekserý júrgizilip jatyr. Jasóspirimniń óz-ózine qol jumsaýynyń sebebi anyqtalady, - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.

Mektep ákimshiligi bolǵan jaıdy ınspektordan estigen. Oqýshy sabaqtan qalmaǵan, minezi de ashyq bolǵan.

Ol – bizdiń mekteptiń 11-synyp oqýshysy. Bıylǵy oqý jylynda sabaqtan qalmaı keldi. Sabaqta júrgen bala ózi. Osy mektep ashylǵaly bizde oqydy. Tártibi jaqsy, minezi ashyq. Joǵalǵan kúni de sabaqqa keldi. Ashyq-jarqyn bala. Oqıǵa týraly mektep ınspektory aıtty. Keshkilik estidik. Naqty jaǵdaı týraly bilmeı otyrmyz, - dedi Aqtóbe qalalyq №8 orta mektep dırektory Aısulý Jaqsybaeva.