Aqtóbede 11 aılyq balasyn dálizde tastap ketken ana izdestirilip jatyr
AQTÓBE. QazAqparat - Aqtóbe oblysynyń turǵyny 11 aılyq balasyn jataqhananyń dálizine tastap ketken. Qazir sábı oblystyq balalar aýrýhanasynda dárigerlerdiń baqylaýynda, dep habarlaıdy QazAqparat agenttigi.
11 aılyq sábı Nına Horenkony balalar aýrýhanasyna jedel járdem jetkizgen. Dárigerlerdiń aıtýynsha, túskende balanyń dene qyzýy bolǵan. Qazir jaǵdaıy jaqsy. Alaıda, tórt kúnnen beri balany eshkim izdep kelmepti.
«Jataqhana turǵyndary polıtseılerdi shaqyrǵan. Olar balany tikeleı sábıler úıine jibermeıdi, sebebi, dárigerlik tekserýden ótkizýi tıis. Sondyqtan, jedel járdem kóligimen bizge alyp keldi. Emizýli bala bolǵannan keıin, anasyn izdedi. Biraq, biz óz tarapymyzdan qajetti qospalardy berip, tamaqtandyrdyq. Jaǵdaıy qazir birqalypty. Eger ata-anasy kelmese, balany sábıler úıine jóneltemiz»,- deıdi oblystyq balalar aýrýhanasy qabyldaý bóliminiń meńgerýshisi Janar Alnııazova.
Nınanyń taǵdyryna aýrýhanada balalary em qabyldap jatqan ata-analar da alańdaýly. Olar sábıge jyly kıimder, jórgekter ákelgenderin aıtady.
« Meniń balam da osy aýrýhanaǵa túsken. Emin alyp boldy, aýrýhanadan shyqtyq. Biraq, Nınany kórgennen keıin, ýaıymdap, búgin shydamaı taǵy jaǵdaıyn bilýge keldim. Eger ata-anasy, týysqandary estise, alyp ketse eken deımin. Osyndaǵy barlyq adamnyń tilegi - col. Sábıge ananyń jylýynan basqa eshnárse kerek emes ǵoı», - deıdi qala turǵyny Inna Rýdakova.
Zada Zeıin
