Aqtóbede 107 adam jansaqtaý bóliminde jatyr
Aqtóbe oblysy boıynsha epıdemıologııalyq jaǵdaı turaqsyz. Óńirde bir táýlikte taǵy 382 adamnan koronavırýs ınfektsııasy anyqtaldy. Qazirgi kezde 1300-den astam adam ınfektsııalyq statsıonarlarda jatyr. Olardyń 107-i jansaqtaý bóliminde.
«Vırýs juqtyrǵan naýqastardyń 12-i ókpeni jasandy jeldetý apparatyna, al 87-i ınvazıvti emes apparatqa qosylǵan. Balalarǵa qatysty aıtar bolsaq, 368-i baqylaýǵa alynyp, 23-i statsıonarǵa jatqyzyldy. Qazirgi kezde ekeýiniń jaǵdaıy turaqty aýyr. Biri týa bitti sal aýrýyna shaldyqqan bolsa, biriniń burynan tynys alý joldary aýyrady. Bir eskere keterlik jaıt, balalar arasynda ólim tirkelmedi. Al júkti áıelderge qatysty derekterge toqtalsaq, barlyǵy 108-i statsıonarda jatyr. Bári dárigerler qaraýynda. Ókinishke qaraı eki kelinshek kóz jumdy. Olardyń búıregi, qalqansha bezi aýyrǵan, qan qysymy da joǵary bolǵan. 25-30 kún em qabyldaǵanymen, nátıje bolmady»,- dedi oblystyq densaýlyq saqtaý basqarmasynyń basshysy Rústem Isaev.
Aıta keteıik, Aqtóbe qalasymen qatar Hromtaý, Qobda, Muǵaljar jáne Baıǵanın aýdandarynda juqtyrý kórsetkishi joǵary. Qazir oblys boıynsha barlyǵy 9,5 myń adam úı karantıninde.