Aqtóbede 102 mln teńgeniń qurylys jumystaryna lıtsenzııa zańsyz berilgen

ASTANA. QazAqparat - Aqtóbe oblysynda qurylys-montaj jumystaryna arnalǵan lıtsenzııalardy zańsyz bergen sheneýnikter isti boldy.  Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın málim etti, dep habarlaıdy QazAqparat tilshisi.

«Aqtóbe oblystyq memlekettik sáýlet-qurylys baqylaý basqarmasy basshysynyń burynǵy orynbasary men osy mekemeniń bólim basshysyna qatysty sotqa deıingi tergeý júrgizilýde. Olar laýazymdyq ýákilettiligin asyra paıdalanyp,  25 kásiporynǵa úlestes tulǵalarǵa tirkelgen izdestirý qyzmeti men qurylys-montaj jumystaryna arnalǵan lıtsenzııalardy zańsyz bergeni úshin kúdikke ilinip otyr», - dedi Nurlan Jahın.

Resmı ókildiń aıtýynsha, lıtsenzııalar ortasha eseppen 8 mln teńgege satylyp,  túsken aqshany bólim basshysy alyp otyrǵan.

«Jalpy zalal somasy 102 mln teńgeni qurap otyr. Bólim basshysy sot sanktsııasymen qamaýǵa alynǵan bolatyn. Al ekinshisine qatysty bultartpaý sharasy qabyldaný ústinde. Tergeý sharalary júrgizilýde», - dedi ol.