Aqtóbede 100 myń teńge para alǵan polıtseı 7 jylǵa bos bostandyǵynan aıyryldy

AQTÓBE. KAZINFORM — Qylmystyq is Alǵa aýdandyq sotynda qaraldy. Sottalýshy jábirlenýshiniń zańdy ókiliniń shyǵynyn da tóleıdi.

Alǵa aýdandyq polıtsııa bóliminiń patrýldik polıtsııa tobynda jumys isteıtin ınspektorlar bıyl qańtar aıynda Aqtóbe-Atyraý tasjolyna kezekshilikke shyǵady. Sol kezde Alǵa qalasyna kireberis jolda «Hyundai Accent» avtokóligin toqtatady.

Sot kabınetindegi is materıalyna súıensek, ınspektorlar júrgizýshi áıel ishimdik ishti dep kúdiktenip, mán-jaıdy anyqtaý úshin patrýldik polıtsııa avtokóligine minýdi suraıdy. Kólikke otyrǵan soń ákimshilik hattama toltyrmaı, kelisimge kelý úshin beınetirkeý qurylǵysyn sóndirip qoıady. Biraq polıtsııa qyzmetkerleri óz aıtqanyn tyńdata almaǵan soń júrgizýshi áıelge Alǵa aýdandyq aýrýhanasyna baratynyn eskertedi. Osy kezde 100 myń teńge para alýdy kózdep, oıyn jetkizedi. Polıtsııa ınspektory 6 qańtar kúni saǵat 16:05–te Alǵa aýdandyq aýrýhanasy mańynda 100 000 teńge para alady. Bir kúnnen soń polıtsııa qyzmetkeriniń úıinen para retinde berilgen aqshanyń 45 myń teńgesi tabylyp, tárkilenedi. Sot otyrysy kezinde sottalýshy ózine taǵylǵan aıyppen kelispedi, moıyndamady. Ol áriptesi ekeýi ákimshilik hattama toltyrǵanyn, sol kezde jábirlenýshi aıqaı-shý shyǵaryp, áldebireýge habarlaıtynyn aıtqan. Aýrýhanaǵa kelgen kezde medıtsına qyzmetkeri bos bolmaı, kólik ishinde áńgime jalǵasady. Sol kezde jábirlenýshi para usynyp, kelisýge úgittegen. Dál osy kezde polıtsııa qyzmetkeri vıdeojetondy sóndirgenin jasyrmady. Sóndirse de esh aqsha almaǵanyn, tintý kezinde tabylǵan aqsha ádeıi tastalǵanyn aıtty. 

Sot sottalýshyny Qylmystyq kodekstiń «Para alý» babymen aıypty dep tanyp, 7 jylǵa bas bostandyǵynan aıyrý jazasyn taǵaıyndady. Inspektor aǵa leıtenant sheninen aıyryldy. Sottalýshy endi ómir boıy quqyq qorǵaý salasynda jumys isteı almaıdy. Jábirlenýshiniń azamattyq talap aryzy ishinara qanaǵattandyrylyp, zańdy ókiliniń 1 mln teńge shyǵyny óndiriledi.

Sot úkimi zańdy kúshine engen joq. Osy is boıynsha apellıatsııalyq shaǵym da tústi.

Eske salsaq, Túrkistan oblysynda polıtseı para aldy degen kúdikpen ustaldy. Áleýmettik jelilerde Túrkistan oblysy Sozaq aýdanynda UQK qyzmetkerleri polıtsııa qyzmetkerine jeke tintý júrgizip, tekserip jatqan beınejazba tarady.