Aqtóbede 100-den astam adamdy aldaǵan sheteldik ınvestor men memlekettik qyzmetkerlerge qatysty qylmystyq is bastaldy
AQTÓBE. QazAqparat - Aqtóbede sheteldik ınvestor Gegam Asrıanǵa qatysty sot otyrysy bastaldy. Aıyptalýshylar qatarynda oblystyq Ádilet basqarmasynyń eki qyzmetkeri jáne birneshe kompanııanyń dırektory men zańgeri bar. Jábirlenýshiler sany 160-qa jetti, dep habarlaıdy QazAqparat tilshisi.
Aqtóbede atyshýly qylmystyq is bastaldy. Qylmystyq kodekstiń «Alaıaqtyq» baby boıynsha shetel ınvestory Gegam Asrıan men onyń sybaılasy bolǵan kompanııa dırektorlary, zańger men Aqtóbe oblystyq ádilet departamentiniń eki qyzmetkeri jaýap berip jatyr. Gegam Asrıanǵa halyqaralyq izdeý jarııalanǵan. Búgingi sot otyrysy kezinde prokýror Osman Orynbasaruly aıyptaý qorytyndysyn oqydy. Іs boıynsha 160 jábirlenýshi bar. Onyń bireýi ekinshi deńgeıli bank.
«Ánzııa Berdenovaǵa asa iri kólemde bótenniń múlkin ıemdengeni úshin aıyp taǵyldy. Ol adamdardyń senimine kirip, Gegam Asrıan, Vıktor Sırota, Elvıra Beznosıýkpen birlesip, Qaıyrbek Orynbasarov, Alfıra Sultanovanyń kómegimen alaıaqtyq jasaǵan. 2010 jyly «Oksı Bıld» kompanııasynyń bas esepshisi bolyp jumys istegen ol Gegam Asrıannyń senimdi ókili bolǵan. Keıin ol «Oksı Bıld» kompanııasynyń dırektory qyzmetin atqardy. 2013 jyly «Adal Úmit» JShS qurylady. Ózi sol kompanııaǵa dırektor bolyp taǵaıyndaldy. Al Vıktor Sırota aldymen bas ınjener bolyp jumysqa ornalasyp, 2014 jyly «Oksı Bıld» kompanııasynyń dırektory boldy. Aıyptalýshy Elvıra Beznosıýk 2013 jyly «KESh Kredıt» shaǵyn nesıe uıymyna dırektory bolyp jumysqa ornalasty»,- dedi prokýror O.Orynbasaruly.
Іs materıalyna súıensek, shetel ınvestory Gegam Asrıan jerdi Forte bankke kepilge qoıyp, nesıe alǵan. Keıin sol banktegi múlikti kepilden bosatý úshin Aqtóbe oblystyq ádilet departamentinde jumys istegen Qaıyrbek Orynbasarovtyń qyzmetin paıdalandy. Ol jerdi kepilden bosatyp, óz qyzmetine eki páter aldy. Jerdi kepilden bosatqan kásipker Gegam Asrıan turǵyn úı qurylysyn bastap, páterlerdi Qazaq bankke kepilge qoıyp, satýǵa shyǵardy. Satyp alýshylar páterdiń ekinshi deńgeıli bankte kepilde turǵanyn múlde bilmegen. Al Aqtóbe oblystyq ádilet departamentiniń qyzmetkeri bolǵan Alfıra Sultanova páterdi kepilden shyǵaryp alyp, keıin óz qyzmeti úshin aýmaǵy 130 sharshy metr bolatyn páterdi syıǵa alǵan.
«Aıyptalýshy Ádilbek Qarabalın «Sanjar Grýpp» JShS, keıin «Arman 2020» turǵyn úı kooperatıviniń dırektory bolǵan. Ol Gegam Asrıannyń qarjylyq jaǵdaıyn bilip, jumys istedi. Al aıyptalýshy Olga Demskaıa kompanııada zańger bolyp jumys istep, alaıaqtyq jumystarǵa aralasty. 2015 jyly Gegam Asrıannyń 8 kompanııasy boldy. Olar: «Adal Úmit», «KESh Kredıt», «Sanjar Grýpp», «Aktobe Hınteg», «Oksı Bıld», «Remstroıservıs Samurat», «Sanjar Intermarket» JShS men «Arman -2020» TÚK qurǵan. Ol adamdardyń, ekinshi deńgeıli bankterdiń senimine kirip alǵan. Uıymdasqan top 2016 jyldyń 2-14 maýsym aralyǵynda Forte banktegi 1 mıllıard 118 mıllıon teńgeden astam kepil múlikti shyǵaryp alǵan. Keıin «Adal Úmit» JShS-nyń tirkeýinde turǵan páterler «Arman-2020» turǵyn úı kooperatıvi arqyly satyldy»,- dedi prokýror.
Eske salsaq, shetel kásipkerine aldanyp qalǵan aqtóbelikter Aqtóbe oblysynyń ákimdiginen kómek surap, istiń aq-qarasyn anyqtap berýdi ótingen bolatyn.
Sot otyrysy jalǵasyp jatyr.
