Aqtóbede 10 jasar dızaınerge bir mln teńgeniń sertıfıkaty berildi
AQTÓBE. QazAqparat – Aqtóbede «Altyn Oimaq» respýblıkalyq baıqaýynda jeńiske jetken Áıgerim Muratqyzyna 1 mln teńgeniń sertıfıkaty berildi, dep habarlaıdy QazAqparat tilshisi.
Baıqaýdy «Atameken» ulttyq kásipkerler palatasy men «Áıelder kásipkerligin qoldaý qory» QQ birge uıymdastyrdy. Qazaqstandyq kıim dızaınerleri arasynda 6 nomınatsııa ıesi anyqtaldy. Kásipkerler palatasyndaǵy «Turaqty damý jáne əıelder kəsipkerligin qoldaý qory» QQ dırektory Dınara Allabergen 1 mln teńgeniń sertıfıkatyn aqtóbelik jas dızaınerge tapsyrdy. Áıgerim Muratqyzy «Ulttyq oıý-órnekpen kómkerilgen balalar kıimi» nomınatsııasy boıynsha óz jumysyn usynǵan. Shyǵarmashylyq saıysqa qatysýǵa onyń anasy Aınagúl Mazınova ótinish bergen. Áıgerim kóılek pishý jáne tigýdi biledi. Ol «Tumar» shyǵarmashylyq akademııasynyń úıirmesine qatysyp, kórkemsýret lıtseıinde bilim aldy. Sondaı-aq ol fortepıanoda oınaıdy, qalalyq jáne oblystyq deńgeıdegi túrli konkýrstarǵa qatysqan. Qazir kórkem gımnastıkamen aınalysady.
«Áıgerim bala kezinen shydamdy, tynysh, ustamdy. Ár jumysta sulýlyq kóredi. Qazir ol ózine kıim tigip, úlken kıimdi birneshe ólshemge azaıta alady. Adamdardan ólshem ala alady. Biz qyzymyz úshin Tashkentten dızaınerDınar Osmandy shaqyrǵan edik», - dedi anasy Aınagúl Mazınova.
Áıgerim Muratqyzy sán ındýstrııasyna óz úlesin qosamyn dep úmittenedi. Anasy Aınagúl Mazınova atele ashýǵa sheshim qabyldaǵan. Qazir ulttyq oıý-órnegi bar fýtbolkalar, kóılekter men balalar kıimderin tigýmen aınalysady.
«Biz Qytaı, Túrkııa, Italııaǵa qaraǵanda jaqsy tigýge bolatynyn kórsetkimiz keledi. Bizde ulttyq salt - dástúrler bar. Bizdiń maqsatymyz - álemdik naryqqa shyǵý», - deıdi jas sheberdiń anasy Aınagúl Mazınova.
Aıta keteıik atalǵan baıqaýǵa 284 ótinim qabyldandy.
