Aqtóbede 10 sáýirden keıin jappaı vaktsınalaý bastalmaq
AQTÓBE. QazAqparat – Aqtóbede sozylmaly aýrýǵa shaldyǵyp, esepte turǵan naýqastarǵa vaktsına egilýde, dep habarlaıdy QazAqparat tilshisi.
Aqtóbe oblysy boıynsha ótken táýlikte 61 adam koronavırýs ınfektsııasyna shaldyqty. Onyń basym bóligi Aqtóbe qalasynyń turǵyny. Sonymen birge Qobda, Mártók, Temir aýdandarynda da vırýs juqtyrǵan naýqastar dáriger kómegine júgindi. Óńirlik kommýnıkatsııalar qyzmetinde ótken brıfıngte oblystyq densaýlyq saqtaý basqarmasynyń basshysy Rústem Isaev ımmýndaý jumysyna toqtaldy.
«Oblysqa 6300 doza vaktsına jetkizildi. Qazir qaladaǵy emhanalarǵa 300 doza vaktsınadan berildi. Sonymen birge aýdandarǵa da jiberildi. Jasy 18-den asqan kez kelgen turǵyn ýchaskelik dárigerine habarlasyp, vaktsına qabyldaı alady. 80 jastaǵy adamnyń da qabyldaýyna bolady. Dál qazirgi kezde sozylmaly aýrýǵa shaldyǵyp, esepte turǵandarǵa basymdyq berilgen. Jappaı ımmýndaý kezinde almatylyq áriptesterimizdiń tájirıbesine súıenip, iri saýda oryndarynda da vaktsına berýimiz múmkin. Ol jerlerge jyljymaly medıtsınalyq keshender qoıylady. Ótken jyly 6 keshen satyp alyndy», - dedi Rústem Isaev.
Shamamen 10 sáýirden keıin ǵana jappaı egý jumysy bastalýy múmkin. Óńir iri kólemde vaktsınanyń jetkizilýin kútip otyr.
