Skýtermen qashyp, 10-nan astam ereje buzǵan júrgizýshi 8 táýlikke qamaldy
ASTANA. KAZINFORM — Aqtóbe qalasynyń basty kósheleriniń birinde patrýldik polıtsııa qyzmetkerleri toqtaý týraly zańdy talapqa baǵynbaǵan skýter júrgizýshisin ustady, dep habarlaıdy QR ІІM baspasóz qyzmeti.
Kólik quralyn basqarý quqyǵy joq júrgizýshi polıtseılerdiń talabyn elemeı, qozǵalysyn jalǵastyrǵan. Osylaısha, ol óz qaýipsizdigine ǵana emes, jol qozǵalysyna qatysýshylardyń ómiri men densaýlyǵyna da qaýip tóndirgen.
Qozǵalysyn jalǵastyrý barysynda skýter júrgizýshisi 10-nan astam jol qozǵalysy erejesin buzǵan. Atap aıtqanda, baǵdarshamnyń tyıym salynǵan qyzyl sıgnalyna ótip, qarsy qozǵalys jolaǵyna shyqqan jáne ózge de qaýipti quqyq buzýshylyqtarǵa jol bergen.
— Atalǵan fakti boıynsha ákimshilik is materıaldary sotqa joldandy. Sot sheshimimen quqyq buzýshyǵa 8 táýlikke ákimshilik qamaqqa alý jazasy taǵaıyndalyp, 1 mıllıon teńge kóleminde aıyppul salyndy, — deıdi tártip saqshylary.
Polıtsııa qyzmetkeriniń kólik quralyn toqtatý týraly zańdy talabyn elemeý jaýapkershilikten bosatpaıdy. Kerisinshe, mundaı áreket joldaǵy jaǵdaıdy ýshyqtyryp, adamdardyń ómiri men densaýlyǵyna qaýip tóndiredi.
Polıtsııa júrgizýshilerdi jol qozǵalysy erejelerin qatań saqtaýǵa jáne polıtsııa qyzmetkerleriniń zańdy talaptaryn oryndaýǵa shaqyrady.
Buǵan deıin BQO-da skýtermen jol erejesin buzǵan jasóspirimniń ata-anasynan 4 mln teńge óndirilgenin jazdyq.
