Aqtóbede 1 jáne 3 jasar sábılerden koronavırýs anyqtaldy
AQTÓBE. QazAqparat - Aqtóbe oblysynda bir jasar sábıden koronavırýs ınfektsııasy anyqtaldy, dep habarlaıdy QazAqparat tilshisi.
Aqtóbe oblysy boıynsha saǵat 9:20-da taǵy jeti turǵynnyń indetke shaldyqqany belgili boldy. Laboratorııalyq zertteý nátıjesinde 1, 3, 8 jastaǵy balalar men 41, 44, 26 jastaǵy turǵyndar ınfektsııalyq aýrýhanaǵa jatqyzyldy. Sonymen birge, 80 jastaǵy qarııadan da vırýs anyqtaldy.
«Olardyń barlyǵy vırýs juqtyrǵan adamdarmen qarym-qatynasta bolǵan, medıtsınalyq baqylaýǵa alynǵan. Zerthanalyq zertteý nátıjesi COVID-19 dıagnozy naqtylandy. Qazirgi tańda olar oblystyq juqpaly aýrýlar statsıonarynyń boks palatasyna jatqyzyldy. Jaǵdaıy - qanaǵattanarlyq. Bekitilgen hattamaǵa sáıkes tıisti em jasalyp jatyr. Naýqaspen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alyndy. Aýrý oshaqtarynda epıdemıologııalyq zertteý, dezınfektsııalyq jumystar júrgizildi», - dep habarlady oblystyq taýarlar men kórsetiletin qyzmetter sapasy men qaýipsizdigin baqylaý departamentiniń baspasóz qyzmeti.