Aqtóbede 1-synypqa baratyn balalardyń qujaty elektrondy túrde qabyldanyp jatyr

AQTÓBE. QazAqparat - Aqtóbe oblysy boıynsha 18 myń bala 1-synypqa mektepke barady. Qazir qujattar elektrondy túrde qabyldanyp jatyr, dep habarlaıdy QazAqparat tilshisi.

«Aqtóbe - adaldyq alańy» jobalyq keńsesi uıymdastyrǵan tikeleı efır kezinde oblystyq bilim basqarmasynyń basshysy Lázzat Orazbaeva bıyl 1-synypqa alty jastan barý qajet ekenin basa aıtty. Alaıda 6 jasynda birinshi synypqa barmaǵan balanyń ata-anasyna aıyppul salynbaıtynyn málimdedi.

«Oblysta qujattyń bári elektrondy túrde qabyldanyp jatyr. Eger qujatty jiberýge ata-ananyń múmkindigi bolmasa, mekteptegi kompıýterdi qoldana alady. Qazir óńirdegi mektepterdiń 70 paıyzynda daıyndyq toby bar, biraq bala úshin 6 jasynda 1-synypqa barǵan jón. Qorqýǵa bolmaıdy, bala áripti mektepte úırenedi», - dedi oblystyq bilim basqarmasynyń basshysy Lázzat Orazbaeva.

Ata-ana muǵalimdi tańdaı almaıdy, elektrondy qujat tapsyrǵan soń mektepke barýdyń esh qajeti joq.

«Balalarǵa qosymsha oqytý, repetıtor jaldaý durys emes. Men bul jalqaý ata-ananyń sózi dep aıtar edim. Bala mektepke barǵanda bir sabaqqa 45 mınýt beriledi, oqýshy taqyrypty sol kezde tolyq ıgerýge mindetti. Eger tolyq túsinbese muǵalimnen suraý kerek. Ustazy sol úshin de eńbekaqy alyp otyr. Buryn bizdi eshkim qosymsha oqytpady, qazir de solaı bolýy tıis. Ata-ana da kómektespegeni jón», - Lázzat Orazbaeva.

Aqtóbe oblysynda 13 úsh aýysymdy mektep bar. Onyń kóbi Aqtóbe qalasynda. Barlyǵy 20 mekteptiń qurylysy júrip jatyr. Degenmen qalada, aýdanda taǵy birneshe mektep úsh aýysymdy bolady.