Aqtóbede 1 synypqa 19 myńnan astam bala qabyldanady

AQTÓBE. KAZINFORM – Aqtóbede 2025-2026 oqý jyldarynda 19 270 bala 1 synypqa qabyldanady. Oblystyq bilim basqarmasynyń basshysy Bulbul Kúzembaevanyń aıtýynsha, qazirgi kezde 15 170 balanyń qujaty qabyldandy. 

Aqtóbede 1 synypqa qujat qabyldaý 31 tamyzǵa deıin jalǵasady. Qazirgi kezde oqýlyqtardy satyp alý jumysy qatar júrip jatyr. 

– Bıyl 4, 7, 8, 10 jáne 11-synyptarǵa jańartylǵan mazmundaǵy oqýlyqtar engizildi. Ony satyp alýǵa bıýdjetten 1,6 mlrd teńge bólindi. Qazirgi kezde 13 baspamen arada 135 kelisimshart jasaldy. Oqýlyqtar 25 tamyzǵa deıin jetkiziledi. Sonymen birge mektepterdi jabdyqtaýǵa oblystyq bıýdjetten 3,1 mlrd teńge bólindi. Byltyrǵyǵa qaraǵanda bıyl pándik kabınettermen jabdyqtaý deńgeıi 71%-dan 80%-ǵa ósti. Jumysshy mamandyqtary jyly aıasynda 9 kolledjge 898 mln teńgeden astam qarjy bólindi. ERG kompanııasy Hromtaý aýdanyndaǵy mektepti jabdyqtaýǵa 200 mln teńge bóldi, - dedi Aqtóbe oblystyq bilim basqarmasynyń basshysy Bulbul Kúzembaeva. 

Aqtóbe oblysy ákiminiń baspasóz qyzmetiniń habarlaýynsha, mektepterde qaýipsizdikti qamtamasyz etý úshin keıingi eki jylda bıýdjetten 1 mlrd teńge bólindi. 152 mektepke «Alaqan» júıesi ornatylyp, ol «Áleýmettik ámııan» platformasymen biriktirildi. Sondaı-aq bilim berý nysandarynyń sanıtarlyq-epıdemıologııalyq jáne órt qaýipsizdigi talaptaryna sáıkestigi tekserilip jatyr. 

Aıta keteıik, mektepterdi qysqy jylytý maýsymyna daıyndaý úshin 807 mln teńgeden astam qarjy qarastyryldy. Oǵan qatty jáne suıyq otyn satyp alynady. 

Sonymen birge 58 qazandyqty aýystyryp, 68-ine qosymsha jabdyq alýǵa 220 mln teńge qajet. Oblystyq bilim basqarmasy bıýdjettik ótinim berdi. 

Eske sala keteıik, jańa oqý jylynda Aqtóbede 6 mektep ashylady.